Dómarar í ævi­langt bann eftir kyn­lífs­mynd­band

Karaarslan hafði verið að dæma í neðri deildum tyrkneska fótboltans og Erdemir, sem er fyrrverandi dómari, hafði starfað sem dómaraeftirlitsmaður á leikjum.

Samkvæmt tyrkneskum miðlum hefur tyrkneska knattspyrnusambandið nú sett þau bæði í ævilangt bann vegna myndbandsins, en Karaarslan hefur lýst því yfir að hún hyggist leita réttar síns og að það sé ekki hún sem sjáist á myndbandinu.

Karaarslan er með nokkur hundruð þúsund fylgjendur á Instagram og hefur verið dugleg að veita þeim innsýn inn í líf dómarans, með myndum og myndböndum af sér á fótboltaleikvöngum. Hún var áður leikmaður Besiktas en hóf dómarastörf eftir að hafa slitið krossband í hné. Nú virðist sem að leikirnir verði ekki fleiri.

Hið sama má segja varðandi eftirlitsmanninn Erdemir, sem áður dæmdi í efstu deild Tyrklands og var með alþjóðleg dómararéttindi. Hann segir myndbandinu hafa verið dreift án hans leyfis:

„Ég hef verið sviptur heiðri mínum og fjölskyldu minnar, vinskap og þátttöku í dómarasamfélaginu. Fyrir utan fjárhagslega skaðann þá er tilfinningalegi skaðinn meiri en orð fá lýst,“ er haft eftir Erdemir í Akdeniz Gercek Gazetesi.

Segist ekki vera á myndbandinu

Játning Erdemir virðist hafa skipt sköpum í þeirri ákvörðun tyrkneska sambandsins að dæma þau Karaaslan í ævilangt bann. Hún hafði haldið því fram að hún væri ekki á myndbandinu.

„Reynt hefur verið að bendla mig við þetta myndband en það hefur ekkert með mig að gera og myndgæðin eru verulega slæm. Manneskjan á myndbandinu er ekki ég og svona alvarlegar ásakanir eru árás á mig sem konu. Ég kem hvergi nálægt þessu myndbandi og því var aldrei deilt á neinum af mínum samfélagsmiðlum,“ sagði Karaaslan.

Hún skrifaði á Instagram: „Þetta verður langt, lagalegt ferli en við munum koma út úr því sterkrai. Ég hlakka til að njóta fulls stuðnings ykkar og ástar allan tímann. Ég ætla ekki að gráta, væla eða vera sorgmædd – það er ekki ég. Ég mun berjast fyrir mínu allt til enda. Ég er bara ein af þessum sem fólk vill reyna að særa og vonandi er ég sú síðasta.“