Verður meðal stærstu hlut­hafa og tekur við stjórnar­for­mennsku

Þetta kemur fram í tilkynningu frá GeoSalmo. Þar segir að Håkon hafi áður verið forstjóri norska landeldisfyrirtækisins Salmon Evolution frá fyrstu skrefum þess og þar til eldisstöðin hafi komist í fullan rekstur. 

„Salmon Evoulution er stærsta landeldi Noregs og í fararbroddi í landeldi á laxi á heimsvísu. Auk þess að hafa yfigripsmikla þekkingu af landeldi hefur Håkon mikla reynslu úr norsku atvinnulífi, hefur starfað við fjárfestingar, viðskiptaþróun og ráðgjöf auk setu í stjórnum fyrirtækja. Håkon kemur til GeoSalmo úr starfi forstjóra Skeie teknologi sem er rótgróið fjárfestingarfyrirtæki í Noregi.

Það er mikil viðurkenning fyrir GeoSalmo og íslenskt landeldi að fá jafnreyndan aðila úr greininni og Håkon er til þess að taka þátt í uppbyggingu og þróun hennar hér á landi. Reynsla hans mun vega þungt við að raungera metnaðarfull áform GeoSalmo um uppbyggingu hátæknilandeldis í Þorlákshöfn. Sem starfandi stjórnarformaður mun Håkon vinna náið með stjórnendateymi GeoSalmo í þeirri uppbyggingu sem framundan er á næstu árum,“ segir í tilkynningunni. 

Um GeoSalmo segir að félagið áformi að reisa að minnsta kosti 33.000 tonna laxeldisstöð á landi við Þorlákshöfn. Fyrirtækið stefni að því að verða leiðandi í landeldi á Íslandi með áherslu á að starfsemi þess sé í sátt við umhverfi og samfélag. Fyrirtækið hefur tryggt sér land, lokið umhverfismati, tryggt sér langtíma orkusamning við Orku Náttúrunnar (ON Power) og lokið öðrum undirbúningi sem gert hefur því kleift að hefja framkvæmdir.