Innlent

Enn ó­ljóst hvaðan fals­boðið um ferða­mennina kom

Lovísa Arnardóttir skrifar
Sveinn Kristján Rúnarsson, yfirlögregluþjónn á Suðurlandi.
Sveinn Kristján Rúnarsson, yfirlögregluþjónn á Suðurlandi. Vísir/Stöð 2

Sveinn Kristján Rúnarsson yfirlögregluþjónn hjá lögreglunni á Suðurlandi segir það enn til rannsóknar hjá embættinu hvaðan tilkynningin kom um týndu ferðamennina í Kerlingarfjöllum í síðustu viku. Umfangsmikil leit fór fram að tveimur ferðamönnum en eftir um tveggja daga leit tilkynnti lögregla að um gabb hefði verið að ræða og frestaði leitinni.

Sveinn Kristján segir það til skoðunar hvort tilkynningin hafi komið erlendis frá en það sé ekki hægt að fullyrða um það að svo stöddu.

„Það er einn af þeim möguleikum sem eru til skoðunar. Það er erfitt að segja til um það núna hvort þetta kom að innan eða utan. Við erum að viða að okkur gögnum og skoða gögn. Netið fer víða og berst víða þannig við erum að skoða hvort tilkynningin hafi mögulega komið að utan.“

Annað sem er til skoðunar er hvort tilkynningin hafi komið úr síma eða tölvu.

„Við eigum eftir að fá endanlega staðfest hvort tilkynningin kom úr síma eða tölvu,“ segir Sveinn Kristján og að lögreglan vinni með fjarskiptafyrirtækjum að því að sækja þessar upplýsingar.

Engin önnur tilkynning borist

Leit var frestað á miðvikudaginn en Sveinn Kristján segir lögreglu hafa eftir það fylgst grannt með mögulegum tilkynningum um týnt fólk. Ekkert hafi borist lögreglu og því leit enn frestað.

„Við höfum ekkert meira fengið um týnt fólk eða einhvern sem ekki hefur skilað sér. Það er allt í þessu sem bendir til þess að um gabb sé að ræða.“

Ekki til að afvegaleiða

Viðurlögin við gabbsímtali eru fjársektir eða um þriggja mánaða fangelsisdómur en fjallað er um það í 120. grein almennra hegningarlaga. Sveinn Kristján afar alvarlegt að kerfið sé misnotað með þessum hætti.

„En maður vill að þetta sé mjög aðgengilegt og auðvelt að óska eftir aðstoð. Það sé ekki of flókið eða of mikið mál.“

Sveinn Kristján segir lögreglu einnig hafa skoðað hvort tilkynningin hafi verið gerð til að afvegaleiða en að ekkert annað hafi gerst á þessum sama tíma sem bendi til þess.

„Maður veit ekki alveg hvað liggur þarna að baki.“

Lögreglumál Björgunarsveitir Landhelgisgæslan Hrunamannahreppur

Tengdar fréttir

Gabbút­köll skapi mjög al­var­lega stöðu fyrir þyrlu­sveitina

Landhelgisgæslan lítur það mjög alvarlegum augum ef útkall í Kerlingarfjöllum á mánudag reynist gabb. Vegna reglna um hvíldartíma geti gæslan ekki alltaf viðhaft fulla þjónustu úti á sjó þegar fara þurfi í útkall, og blóðugt að slík staða komi upp vegna útkalla sem reynist ekki á rökum reist. 

Sterkar vísbendingar um falsboð

Sterkar vísbendingar eru um að tilkynning um að tveir ferðamenn hafi fests í helli sem barst neyðarlínu í gærkvöldi hafi verið falsboð. Tilkynningin varð til þess að viðbragðsaðilar fóru í umfangsmikla leit sem ekki hefur skilað árangri.

Telja bílinn ekki á vegum ferðamannanna

Bílaleigubíll sem fannst yfirgefinn á bílastæði við tjaldstæði í Kerlingarfjöllum er ekki  talinn vera á vegum ferðamannanna tveggja sem tilkynntu að þeir væru fastir í helli.

Leitar­svæðið tor­sótt og erfitt yfir­ferðar

Leitarsvæðið við Kerlingarfjöll er mjög torsótt og erfitt yfirferðar fyrir göngufólk, hjól og jeppa, en björgunarsveitir hafa sett mikinn kraft í leit með drónum. Landslagið er síbreytilegt vegna snjóa, rigningar og drullu. Leit hefur staðið yfir að ferðamönnum sem taldir eru fastir í helli við Kerlingarfjöll síðan í gærkvöldi.

Fundu tóman bíla­leigu­bíl og ræsa út leitar­hunda

Björgunarsveitir hafa fundið það sem þau telja fyrstu vísbendinguna sem hægt er að vinna eftir, í leit að tveimur ferðamönnum sem talið er að séu fastir í helli nærri Kerlingarfjöllum. Bílaleigubíll sem skráður er á tvo ferðamenn fannst við tjaldstæði. Enginn á svæðinu kannast við að bera ábyrgð á bílnum. Kallað hefur verið til leitarhunda.

Mest lesið


Fleiri fréttir

Sjá meira


×

Mest lesið