Fer ófögrum orðum um frammi­stöðu Rice: „Hann er gagns­laus“

Van der Vaart, sem á sínum tíma spilaði 109 leiki fyrir hollenska landsliðið, hefur ekki beint verið þekktur fyrir að skafa af hlutunum eftir að leikmannaferli hans lauk. 

Þessi fyrrverandi leikmaður Tottenham hafði ýmislegt að segja um frammistöðu Declan Rice á Evrópumótinu, en Van der Vaart veltir fyrir sér hvað það er sem Rice kemur með að borðinu.

Arsenal borgaði rúmlega hundrað milljónir punda fyrir Rice síðasta sumar og hann lék hverja einustu mínútu fyrir enska landsliðið á nýafstöðnu Evrópumóti þar sem Englendingar þurftu að sætta sig við silfur.

„Hundrað milljónir fyrir Declan Rice. Hvað gerir hann? Hann kemur og sækir boltann bara til að senda hann aftur á John Stones,“ sagði Van der Vaart um frammistöðu Rice.

„Hann er gagnslaus. Ef þú ert virkilega hundrað milljón punda virði þá áttu að geta sent boltann fram völlinn líka.“