Í fréttatilkynningu frá BSRB segir að líkt og þeir kjarasamningar sem aðildarfélög BSRB undirrituðu í gærkvöldi og í nótt feli samningurinn í sér sambærilegar launahækkanir og samið var um á almennum vinnumarkaði fyrr á árinu.
Auk Landssambands lögreglumanna undirrituðu fulltrúar sjö aðildarfélaga BSRB og samninganefndar ríkisins nýjan kjarasamning sem gildir eins og aðrir samningar frá 1. apríl 2024 til 31. mars 2028. Félögin sem samkomulagið nær til eru Kjölur - stéttarfélag starfsmanna í almannaþjónustu, Félag opinberra starfsmanna á Austurlandi, FOSS - stéttarfélag í almannaþjónustu, Starfsmannafélag Húsavíkur, Starfsmannafélag Kópavogs, Starfsmannafélag Suðurnesja og Starfsmannafélag Vestmannaeyjabæjar.
Þá segir að á næstu dögum verði nýir kjarasamningar kynntir fyrir félagsfólki áður en þeir verða bornir undir atkvæði. Nú hafi aðildarfélög BSRB gengið frá kjarasamningum sem nái til meirihluta félagsfólks aðildarfélaga bandalagsins. Vonir standi til að gengið verði frá fleiri kjarasamningum á næstu dögum.
