For­seta­efni tekin í krefjandi at­vinnu­við­tal í kapp­ræðum kvöldsins

Halla Tómasdóttir sem verið hefur á mikilli siglingu í könnunum undanfarnar vikur er nú komin algerlega upp að Katrínu Jakobsdóttur. Nú mælast þær báðar með 24,1 prósent í könnun Maskínu fyrir fréttastofuna sem birt var í hádeginu. Þetta er minnsta fylgi sem Katrín hefur mælst með í könnunum Maskínu frá 8. apríl.

Auk Höllu og Katrínar mæta þau Halla Hrund Logadóttir, Baldur Þórhallsson, Jón Gnarr og Arnar Þór Jónsson í kappræðurnar í kvöld.

Heimir Már Pétursson fréttamaður stýrir umræðunum eins og fyrri kappræðum hinn 16. maí sem fékk mjög mikið áhorf. Hann lofar spennandi þætti þar sem frambjóðendur verði spurðir krefjandi spurninga.

„Kosningabaráttan er nú á algjöru háspennustigi og gríðarleg óvissa um úrslitin. Það er hins vegar næsta víst af könnunum að sjöundi forseti íslenska lýðveldisins verður kona. Það er kannski táknrænt að þessar forsetakosningar eru þær mest spennandi frá því Vigdís Finnbogadóttir náði fyrst kvenna í heiminum lýðræðislegu kjöri í embætti forseta með 33,8 prósenta fylgi," segir Heimir Már.

 Það væri minnsta fylgi sem forseti hafi fengið til þessa á Íslandi. Einungis hafi munaði 1,5 prósentustigum á Vigdísi og Guðlaugi Þorvaldssyni, eða 1.900 atkvæði.

Auk þess sem frambjóðendur verða spurðir spjörunum úr í sjónvarpssal verður boðið upp á nýjungar í anda þess þegar fólk sækir um mikilvægt starf. Líklega eru fá störf eða embætti sem njóta jafnmikillar virðingar og embætti forseta Íslands. Elísabet Inga Sigurðardóttir hitti frambjóðendurna hvern fyrir sig og spurði þau öll krefjandi spurninga á meðan klukkan tifaði. Sjón er sögu ríkari.

Fylgið á mikilli hreyfingu allt frá upphafi

Nú hafa verið gerðar tuttugu og tvær kannanir frá 8. apríl og von er á tveimur til viðbótar í dag. Af þeim tuttugu og tveimur könnunum sem þegar hafa verið birtar frá Maskínu, Gallup, Prósenti og Félagsvísindastofnun hefur Katrín verið efst í tólf. Halla Hrund hefur leitt í níu könnunum, Baldur í tveimur og nú í dag er Halla Tómasdóttir efst ásamt Katrínu.

Það hefur sýnt sig að framistaða sex efstu frambjóðenda í kosningabaráttunni og í fjölmiðlum getur haft töluverð áhrif á kjósendur. Sömleiðis sýna kannanir að þrátt fyrir mikla athygli í fjölmiðlum landsins hefur fylgi þeirra frambjóðenda sem mælast með minnsta fylgið ekkert breyst.

Steinunn Ólína Þorsteinsdóttir hefur þó einu sinni komist í 3,4 prósent hinn 15. apríl hjá Prósenti og nokkrum sinnum dansað í kring um tvö present. Lengst af hefur fylgi þessara sex mælst um eða undir hálfu til einu prósenti. Samanlagt fylgi þessara sex hefur verið á bilinu 3-4 prósent.