Strangt til tekið segir Sigrún daginn vera þann 20.maí ár hvert, en þetta er í fimmta sinn sem hann er haldinn á alþjóðavísu.
„En sá dagur ber upp á Annan í Hvítasunnu og því ákváðum við að á Íslandi myndum við halda upp á daginn í dag.”
Sigrún segir fullt tilefni til að huga að mannauðsmálum vinnustaða alla daga.
Framtíðin er aldrei sem fyrr á fleygiferð og það er mjög mikilvægt fyrir fyrirtæki, skipulagsheildir og einstaklinga að tileinka sér þau nýju tæki, tól og aðferðir sem í boði eru til þess.”
Í tilefni dagsins, rýnum við í þær áherslur sem Evrópusamtök mannauðsfólks (EAPM) völdu að þessu sinni, en í samtökunum eru 34 Evrópuþjóðir.
Hvernig er Íslandi að ganga?
Ísland er aðili að EAPM samtökunum, sem í tilefni dagsins standa fyrir ráðstefnu þar sem þegar er búið að leggja drög að þeim áherslum sem leiða umræður.
Sigrún, sem er formaður Evrópunefndar Alþjóðlega Mannauðsdagsins, hefur stýrt starfi undirbúningshópsins undanfarið.
Hún segir Mannauð, félag mannauðsfólks á Íslandi, hafa í ár ákveðið að leggja áherslu á fjölbreytileika á vinnustöðum og þá sérstaklega innflytjendur á vinnumarkaði.
„Þegar við tölum um fjölbreytileika þá erum við ekki bara að tala um innflytjendur heldur alla þátttakendur vinnumarkaðsins í heild sinni. Við erum að tala um kyn, uppruna, kynþætti, aldur, fötlun eða skerta starfsgetu og svo framvegis,“ segir Sigrún.
Í tilefni þessa, stendur Mannauður fyrir opinni málstofu í dag þar sem innflytjendur segja frá reynslu sinni og upplifun af því að koma til Íslands og starfa. Dagskránna má sjá nánar hér.
„Til Íslands hafa flutt þúsundir einstaklinga frá öðrum löndum með nýjar og öðruvísi hugmyndir og með eldmóð til að koma þeim í framkvæmd. Fyrir vikið er Ísland fjölbreyttara og betra.“
Þá segir Sigrún að félagið hafi nýverið hafið samstarf við Öldu um að mæla inngildingu á vinnustöðum.
„Þetta er þá könnun sem mun mæla upplifun starfsfólks á vinnustaðamenningu og sérstaklega hvernig upplifanir dreifast eftir ólíkum félagshópum eins og kyni, uppruna, kynþætti, fötlun og svo framvegis.“
Í kjölfarið er ætlunin að gefa út inngildingarvísitölu fyrir Ísland sem fyrirtæki og stofnanir geta nýtt sér til að gera samanburð á því hvernig vinnustaðamælingin er að mælast hjá þeim í samanburði við aðra.
„Það verður áhugavert að sjá stöðuna á þessum málum í íslensku atvinnulífi.“
Sigrún segir ávinning vinnustaða af fjölbreytileika vera heilmikinn. Enda séu vinnustaðir með fjölbreyttum mannauði betur í stakk búir til að takast á við fjölbreyttar áskoranir. Hvort sem þær felast rekstri, þjónustu eða framleiðslu.
Við megum heldur ekki gleyma því að um 23% starfsfólks á íslenskum vinnumarkaði eru erlendir ríkisborgarar og það er bæði nauðsynlegt og dýrmætt að innan fyrirtækjanna sé starfsfólk úr þeirra röðum.“
Gervigreind, siðferði og fleira
Sigrún segir áherslu EAPM ekki síst felast í því að ræða tækniþróunina þar sem gervigreind og siðferði er til sérstakrar umræðu.
Enda segir hún fullt tilefni til þess að þau mál séum rædd.
„Hér erum við að tala um miklar og hraðar tæknibreytingar, gervigreindina, nýja kynslóð á vinnumarkaði, fjölbreytileika á vinnumarkaði, breytta vinnuaðstöðu og breytt skipulag húsnæðis, aukið jafnrétti, aukna áherslu á velferð starfsmanna, fjarvinnustefnu og töluvert breytt landslag í stjórnun og samskiptum.“
Þá segir hún mikilvægt að vinnustaðir setji breytingar líka í samhengi við þau gífurlegu áhrif sem heimsfaraldurinn hafði til frambúðar.
Þó við séum orðin ansi þreytt á því að tala um COVID, þá ýtti heimsfaraldurinn úr vör þessum miklum breytingum, bæði tæknibreytingum og lífsstílsbreytingum sem lengi hafði verið talað mikið um en fóru aldrei af stað fyrr en í og eftir COVID.“
Allt ofangreint segir Sigrún undirstrika þær stóru en spennandi áskoranir sem mannauðsfólk stendur frammi fyrir. Þar segir hún ekki síst mikilvægt fyrir íslenskt félag eins og Mannauð, að taka fullan þátt í alþjóðlegu samstarfi.
„Sem eykur víðsýni og styrkir okkur faglega.“
Önnur lykilatriði árið 2024
Sigrún segir önnur lykilatriði sem valin voru sérstaklega sem umræðuefni í ár var eftirfarandi:
●Vinnustaðir framtíðar verða endurskilgreindir
Skipuleggjendur dagsins segja að áhersla á traust, þar sem jafnrétti, fjölbreytileiki og inngilding eru samofin menningu vinnustaðarins sé kjarni góðra vinnustaða. Að veita starfsfólkinu rödd, opna á sveigjanleika, ræða opinskátt um mikilvæg viðfangsefni eins og launamun og ýta undir vellíðan og jafnvægi milli vinnu og einkalífs er kjarninn í því að viðhalda góðri frammistöðu og framleiðni, ásamt því að gefa einstaklingum færi á að vaxa og dafna.
●Framúrskarandi leiðtogahæfileikar
Sérfræðingar í mannauðsmálum þurfa að átta sig á því að þau bera ábyrgð á að taka ákvarðanir sem setja starfsfólkið í fyrsta sæti og eru byggðar á siðferðilega góðum og sannrýndum gögnum og upplýsingum.
Hjá þeim liggur ábyrgðin á að þróa og þjálfa leiðtoga og stjórnendur sem byggja upp vinnustaði þar sem allir eru velkomnir og fólki finnst það geta verið besta útgáfan af sjálfu sér á hverjum degi.
●Stöðug fjárfesting í færni og símenntun
Þar sem færnikröfur eru að breytast hraðar en nokkru sinni fyrr þá skiptir miklu máli að tryggja að starfsfólk fái tækifæri til að efla þekkingu sína og færni. Það mun skila aukinni framleiðni fyrir fyrirtæki og skipulagsheildir og skila vinumarkaðnum í heild sterkari og eftirsóknarverðara starfsfólki. EAPM segir mannauðsfólk vera lykilaðila í því að halda samtalinu um síþjálfun og símenntun gangandi. Það er samfélaginu öllu til góða að ýtt sé undir tækifæri fólks til að sækja nám samhliða vinnu og þá sérstaklega fyrir jaðarsetta hópa og þá sem eiga í hættu að færni þeirra verði úrelt með tilkomu nýrrar tækni.
