Bjarni Bene­dikts­son nýr for­sætis­ráð­herra

Þetta kemur fram á blaðamannafundi ríkisstjórnarinnar í Hörpu sem hófst klukkan 14. Guðmundur Ingi Guðbrandsson, formaður VG, verður áfram félagsmálaráðherra og Bjarkey Olsen Gunnarsdóttir kemur inn í ríkisstjórn og verður matvælaráðherra. Þórdís Kolbrún Reykfjörð Gylfadóttir verður aftur utanríkisráðherra. Lyklaskipti verða á morgun og ríkisráðsfundur í kvöld.

„Samstarf þessara þriggja flokka á sér djúpar rætur. Við höfum verið í samstarfi frá árinu 2017 og eftir kosningarnar 2021 var stjórnarsamstarfið endurnýjað og stjórnarsáttmálinn uppfærður miðað við þær aðstæður sem þá voru í samfélaginu,“ sagði Bjarni í upphafi fundarins.

Flokkarnir hafi átt mjög góðar viðræður undanfarna daga og ríkisstjórnin verið að máta sig við þær samfélagsaðstæður sem nú eru uppi. 

„Þær breytingar sem verða í ríkisstjórninni eru þá þær að forsætisráðherrastóllinn færist til Sjálfstæðisflokksins og ég mun færast yfir í forsætisráðuneytið. Sigurður Ingi fer þá í fjármálaráðuneytið og innviðaráðuneytið færist þá til Vinstri grænna. Það leiðir af eðli máls að það kemur inn nýr ráðherra fyrir Vinstri græna í stað þess sem hverfur á braut,“ sagði Bjarni. 

Það hafi verið ríkisstjórninni mikilvægt að tryggja áfram pólitískan stöðugleika þrátt fyrir brotthvarf Katrínar. Mörg mál þurfi að klára í gegnum þingið áður en blásið verði til annarra kosninga og nefnir Bjarni mál eins og frumvarp félagsmálaráðherra um örorku, orkumálin og málefni innflytjenda og hælisleitenda. 

„Það mál er nú komið inn í þingið og það er algjört forgangsmál að það mál fái að klárast á þessu þingi. Slík áform verða auðvitað að engu ef menn ná ekki saman og þess vegna höfum við notað tímann vel til þess að ná saman. Við teljum að við búum við góðar ytri aðstæður. Nú er nýlokið kjarasamningagerð, það er uppsláttur í hagkerfinu heilt yfir þó verðbólga sé enn of mikil og við stefnum mjög bjartsýn fram veginn,“ segir Bjarni. 

Niðurstaða komin í gær

Katrín Jakobsdóttir tilkynnti framboð sitt til forseta á föstudaginn og lét af störfum sem formaður Vinstrihreyfingarinnar - græns framboðs samdægurs. Á sunnudag fór hún á fund Guðna Th. Jóhannessonar forseta landsins og baðst lausnar fyrir sig og sitt ráðuneyti. Guðni varð við því en fól henni að sitja áfram sem forsætisráðherra þar til ný ríkisstjórn væri mynduð. 

Formenn ríkisstjórnarflokkanna þriggja hafa undanfarna daga fundað stíft og reynt að ná saman í helstu deilumálum enda hefur verið talað um að Katrín hafi verið límið í ríkisstjórninni og því ýmislegt sem ný forysta flokksins þurfti að ræða við Sjálfstæðismenn og Framsóknarmenn. 

Niðurstaða um það hvernig ráðherrastólum yrði stokkað upp var komin í gærkvöldi. Sjálfstæðisflokkurinn samþykkti breytingar á ríkisstjórn á þingflokksfundi í gærkvöldi og Framsóknarmenn á fundi í morgun. Vinstri græn samþykktu breytingarnar á þingflokksfundi í hádeginu.

Fréttin hefur verið uppfærð.