Viðskipti innlent

Kass heyrir sögunni til

Kolbeinn Tumi Daðason skrifar
Jón Guðni Ómarsson er bankastjóri Íslandsbanka.
Jón Guðni Ómarsson er bankastjóri Íslandsbanka. Vísir/Vilhelm

Stjórnendur Íslandsbanka hafa ákveðið að loka appinu Kass eftir átta „ánægjuleg og lærdómsrík ár“. Það var fyrst tekið í notkun í byrjun árs 2016, en það er í eigu Íslandsbanka og þróað í samstarfi við Memento.

Með appinu hafa notendur geta millifært peninga sín á milli líkt og í samkeppnisforrtinu Aur sem er í eigu Kviku banka. Kvika keypti Aur á 458 milljónir króna árið 2021 af Nova og fleiri hluthöfum.

Íslandsbanki stofnaði Kass í framhaldi af velgengni Aur en forritið náði þó aldrei víðlíka vinsældum. Kass fékk íslensku vefverðlaunin, sem Samtök vefiðnaðarins standa fyrir, sem besta appið 2016 og segir í tilkynningu Íslandsbanka að það hafi haft mikil áhrif á notkun greiðslutækja á Íslandi.

„Umhverfi fjártækni og greiðslulausna er hins vegar síkvikt og breytingar örar. Mikil þróun hefur átt sér stað í appi Íslandsbanka og mun sú þróun halda áfram og taka mið af þörfum viðskiptavina,“ segir í tilkynningu Íslandsbanka.

„Íslandsbanki fylgist jafnframt náið með þeirri miklu og hröðu þróun sem á sér stað á sviði tæknilausna í fjármálaþjónustu og leggur ríka áherslu á samstarf og stuðning við verkefni sem koma muni viðskiptavinum bankans til góða.“

Íslandsbanki Tækni Fjártækni Fjármálafyrirtæki Greiðslumiðlun


Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið


Fleiri fréttir

Sjá meira


×

Mest lesið