Segja að loðnan gæti verið að bíða eftir nýju tungli

Í færslu á vef Vinnslustöðvarinnar segir að spurningin um það hvort loðnan komi í veiðanlegum mæli inn í íslenska fiskveiðilögsögu eða láti ekkert sjá sig í ár brenni á margra vörum. Ekki síst þeim sem búa í sjávarplássum og þeim sem ráðstafa þeim gjaleyristekjum sem góð loðnuverðtíð myndi afla.

„Fylgst er líka með gangi mála utan landsteinanna og þá ekki hvað síst í Japan þar sem væntanlegir kaupendur og neytendur loðnu og loðnuafurða bíða spenntir. Þaðan úr fjarlægu austrinu heyrist að of snemmt sé að örvænta því hegðun loðnunnar nú kunni frekar að skýrast af gangi himintungla en af meintum duttlungum hennar.“

Sölustjórinn í Japan sefar áhyggjur Eyjamanna

Í færslunni segir að heimildarmaður himintunglakenningarinnar sé Yohei Kitayama, sölustjóri Vinnslustöðvarinnar í Japan. Mun minna tilefni en þetta þurfi til að slá á þráðinn til hans í Tókýó.

„Loðnuleysið við Ísland barst í tal við eftirvæntingarfullan viðskiptavin okkar á dögunum. Sá var áður til sjós svo áratugum skipti og sagði að sjómenn í Japan og annars staðar í Asíu stúderuðu alltaf stöðu tunglsins á hverjum tíma til að ráða í fiskgengd á miðum. Það væri nefnilega margsannað og staðfest í aldanna rás að fiskur hefði hægt um sig í sjónum og æti helst ekkert á fullu tungli en yrði aftur virkur með vaxandi nýju tungli. Þá færi hann að hreyfa sig og éta,“ er haft eftir Kitayama.

Viðskiptavinurinn hafi spurt hvernig þetta kæmi heim og saman við stöðu loðnunnar á Íslandsmiðum. Þegar málið var kannað hafi komið í ljós að fyrir einu ári var fullt tungl 5. febrúar en í ár, 2024, verði tunglið ekki fullt fyrr en 24. febrúar, eða með öðrum orðum þremur vikum síðar en á árinu 2023.

„Það styttist mjög í fullt tungl og síðan nýtt tungl. Öndum rólega enn um sinn og sjáum hvað gerist þegar nýja tunglið kviknar og dafnar. Skyldi nú ekki vera að loðnan hinkri eftir kvartilaskiptum og að ferli hennar sé einfaldlega nokkrum vikum síðar á ferðinni en í fyrra. Það væri alla vega í samræmi við reynslu og speki okkar sem stundum fiskveiðar í þessum heimshluta,“ er haft eftir viðskiptavininum eftirvæntingafulla.“

Binni kannast ekki við kenninguna en lumar á sinni eigin

Færsluhöfundur ákvað að bera spekina undir Sigurgeir B. Kristgeirsson, Binna í Vinnslustöðinni.

„Allir sem þekkja til sjómennsku vita að sjómenn tala um að fiskur gangi við breytingu strauma. Við nýtt tungl kviknar nýr straumur. Það sem ég hef aldrei heyrt áður er að dagatal sólar og tungls fari ekki saman en straumar tengjast gangi tungls en ekki sólar.“

Hann segir að þegar loðna gefur sig út af Austfjörðum í janúar og fram í febrúar sé hrognafylling hennar 8 til 12 prósent og þegar hún kemur upp að suðausturströndinni sé hrognafyllingin yfirleitt á bilinu 12 til 14 prósent.

„Loðnan sem fannst á dögunum úti fyrir Austfjörðum var ekki talin í veiðanlegum mæli en eftirtekt vakti að hrognafyllingin var einungis um 8%. Loðnan átti því langt eftir í þroskaferlinu að þessu leyti. Hennar tími var ekki kominn. Kenning þessa viðskiptavinar okkar í Japan gengur því að þessu leyti upp, hvað svo sem síðar kann að gerast þegar japanska sjómannaspekin gengst undir próf reynslunnar á Íslandsmiðum á næstu dögum og vikum!“