6 dagar í EM: Sjötta besta Evrópu­mót strákanna okkar

Fyrsti leikur íslenska karlalandsliðsins á Evrópumóti karla í handbolta er 12. janúar næstkomandi eða eftir sex daga. Vísir ætlar að telja niður í komandi Evrópumót með því að raða upp bestu Evrópumótum strákanna okkar í gegnum tíðina.

Sjötta sætið yfir bestu Evrópumót strákanna okkar kemur í hlut Evrópumótsins í Serbíu árið 2012.

Íslenska liðið hafði náð frábærum árangri á síðustu þremur stórmótum sínum á undan þessu, varð í öðru sæti á ÓL 2008, vann bronsverðlaun á EM 2010 og endaði í sjötta sæti á HM ári áður. Þetta er hins vegar mót sem stóð ekki undir væntingum sem engu að síður voru dottnar talsvert mikið niður þegar kom að mótinu í janúar.

Íslenska liðið varð nefnilega fyrir áföllum í kringum EM 2012, bæði fyrir og inn á mótinu. Liðið fór út án helstu leiðtoga liðsins, Ólafs Stefánssonar og Snorra Steins Guðjónssonar, og þá var Alexander Petersson meiddur og gat ekki spilað í milliriðlinum. Liðið var einnig svo gott sem án lykilmannsins Ingimundar Ingimundarsonar í varnarleiknum því hann gat lítið beitt sér.

Sóknarleikurinn var engu að síður magnaður þar sem Guðjón Valur fór á kostum í vinstri horninu og þeir Aron Pálmarsson og Arnór Atlason voru mjög góðir fyrir utan.

Arnór kom að 46 mörkum (21 mark og 25 stoðsendingar) og Aron kom að 44 mörkum (22 mörk og 22 stoðsendingar) samkvæmt opinberri tölfræði mótsins.

Það vantaði ekki mikið upp á það að liðið færi enn lengra en frammistaðan lofaði góðu fyrir næsta mót sem voru Ólympíuleikarnir í London. Vonbrigðin þar eru grátlegt tap á móti Ungverjum í átta liða úrslitum en frammistaðan í London seinna um sumarið var mögnuð engu að síður.

Sigur á Noregi dugði íslenska liðinu til að komast upp úr riðlinum og íslenska liðið byrjaði milliriðilinn á flottum sigri á Ungverjum. Íslenska liðið hélt síðan Frökkum fyrir neðan sig í milliriðlinum með því að gera jafntefli við Frakka í lokaleiknum.

Umræðan eftir mótið var frekar jákvæð þrátt fyrir að liðið hafi bara endað í tíunda sætinu. Sætið skilaði strákunum líka inn í forkeppni Ólympíuleikana. Menn sáu möguleikana í liðinu ekki síst þegar lykilmennirnir myndu snúa aftur.

Besti leikmaður Íslands á mótinu:

Guðjón Valur Sigurðsson spilaði sig inn í úrvalslið mótsins en hann skoraði 41 mark í sex leikjum og nýtti 65 prósent skota sína. Guðjón spilaði hverja einustu sekúndu á mótinu því hann var aldrei tekinn af velli og fékk enga brottvísun. Arnór Atlason spilaði einnig mjög vel á þessu móti sem og Aron Pálmarsson.

Óvænta stjarnan:

Rúnar Kárason kom inn í þrjá síðustu leikina og skoraði þá 9 mörk þar af sjö þeirra úr langskotum. Hann var valinn maður leiksins hjá Íslandi í síðustu tveimur leikjunum en í jafnteflinu á móti Frökkum í lokaleiknum þá skoraði hann fjögur flott mörk.

Fyrsta mótið hjá:

Ólafur Bjarki Ragnarsson, Rúnar Kárason og Aron Rafn Eðvarðsson.

Síðasta mótið hjá:

Ólafur Bjarki Ragnarsson.

Viðtalið: „Enginn úti að aka í þessu móti“

Fyrirliðinn Guðjón Valur Sigurðsson var nokkuð sáttur eftir skrautlegt EM í viðtali við Fréttablaðið.

„Það hefði verið mjög gaman að vinna. Við vorum að spila frábærlega og ég hélt við værum með þá. Þeir eru bara með svo mikið stórskotalið að það er enginn hægðarleikur að klára þá,“ sagði landsliðsfyrirliðinn Guðjón Valur Sigurðsson eftir lokaleik Íslands á EM sem endaði með jafntefli gegn Frökkum.

„Þetta hefur verið svolítið skrítið mót. Ég var sáttur við Króataleikinn en ekki úrslitin. Var ósáttur við Noregsleikinn en sáttur við úrslitin og Slóveníu-leikurinn var ekki nógu góður. Ungverjaleikurinn frábær og Spánverjarnir voru of sterkir. Mér finnst við vera að gera nokkuð vel úr því sem höfum,“ sagði Guðjón Valur.

Liðið var án Ólafs Stefánssonar og Snorra Steins Guðjónssonar í Serbíu og svo var Alexander Petersson meiddur og tók vart þátt. Ingimundur Ingimundarson var einnig meiddur og lék takmarkað. „Strákarnir sem hafa komið inn hafa staðið sig mjög vel. Svo sé maður samt þessa skrokka sem eru að koma inn hjá hinum þjóðunum og maður hugsar bara hvað sé eiginlega verið að gefa þeim að borða. Við erum kannski að lenda aðeins á eftir þar. Ég er gríðarlega ánægður með hvernig Bjöggi og vörnin rifu sig upp þó svo það vanti Ingimund og Alexander,“ sagði Guðjón.

„Sóknin var mjög góð allt mótið þó svo okkur hafi vantað lykilmenn. Rúnar hefur komið gríðarskemmtilega inn hjá okkur. Kári er sterkur og Ásgeir að axla meiri ábyrgð. Lykilmenn líka að standa sig vel. Það er ekki hægt að segja um neinn að hann hafi verið úti að aka í þessu móti. Flest var á uppleið í þessu móti og við erum nokkuð sáttir.“