Auglýsingatekjur renna óskiptar til Grindvíkinga

Stöð 2 18. nóvember 2023 09:15

Frítt verður inn á leikina í Smáranum í dag og búist við að Grindvíkingar fjölmenni og styðji sín lið. Hulda Margrét

Kvennalið Grindavíkur í körfubolta spilar við Þór frá Akureyri klukkan 14 í dag og karlaliðið mætir Hamri klukkan 17. Leikirnir fara fram í Smáranum og verða báðir í beinni á Stöð 2 Sport og í opinni dagskrá. Sölutekjur Stöðvar 2 vegna auglýsinga á leikjunum renna óskiptar til Grindvíkinga.

„Það er á svona stundum sem íþróttir geta verið öflugt sameiningarafl fyrir samfélagið, í þessu tilviki íbúa Grindavíkur. Körfuboltinn hefur verið risastór hluti af tilveru Grindvíkinga um árabil og við vildum sjá til þess að þjóðin öll hafi tækifæri að gleðjast með þeim á þessum erfiðu tímum. Það var svo einhugur innan Sýnar um að vilja leggja Grindvíkingum lið með því að láta auglýsingatekjur vegna útsendingarinnar renna óskertar í söfnun Rauða krossins vegna jarðhræringanna. Hugur okkar allra er með Grindvíkingum,“ segir Eiríkur Stefán Ásgeirsson, forstöðumaður íþrótta á Stöð 2.

Brugðust við kallinu

Kolbrún Dröfn Ragnarsdóttir, deildarstjóri auglýsingadeildar segir markaðinn hafa brugðist vel við hugmyndinni um að styðja Grindvíkinga með þessum hætti.

„Við leituðum til birtingahúsa og fyrirtækja og fengum frábær viðbrögð. Grindvíkingar eru í virkilega erfiðri stöðu og fyrirtæki vilja leggja sitt af mörkum. Það komust færri að en vildu því fyrirvarinn var skammur og við hvetjum þau fyrirtæki sem náðu ekki inn í leikina að styðja við Grindvíkinga með öðrum hætti," segir Kolbrún. Hægt að leggja söfnuninni beint lið á heimasíðu Rauða krossins.

Þau fyrirtæki sem styrkja Grindavík með auglýsingakaupum á leikjunum eru Apótekarinn, Arion banki, Bónus, Brim, Brimborg, Góa, Hagi, Hagkaup, Jysk, Íslensk getspá, Kemi, KFC, Mjólkursamsalan, Olís, Orkan, Sjóvá og Vís.

Frítt verður inn á leikina í Smáranum og búist við að Grindvíkingar fjölmenni og styðji sín lið.

UMF Grindavík Subway-deild kvenna Subway-deild karla Grindavík

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.