Veiðin með Gunnari Bender - 6. þáttur

Þáttinn í heild sinni má sjá hér fyrir neðan:

Gunnar Bender kíkti í Fáskrúð í Dölum í september og renndi fyrir lax með tónlistarmanni sem flestir þekkja sem Villa Naglbít. Vilhelm Anton Jónsson segir að þetta sé ein af fallegri ám landsins og nýtur hann þess vel að koma og veiða í ánni. Hann kemur ásamt skemmtilegum veiðihóp sem hann tilheyrir, einu sinni á ári. Villi segir áhorfendum veiðisögur, frá maríulaxinum sínum og fleira til. Í þættinum er einnig rætt við Arnór Björnsson sem er vinur Villa og mikill veiðimaður.

Þegar Gunnar og tökulið kom á svæðið var alveg hífandi rok og ringdi á köflum, en rokið var svo mikið að erfitt var fyrir veiðimenn og tökulið að standa í lappirnar. Daginn eftir var þó betra veður og þá er þetta svæði algjör paradís. Fáskrúð í Dölum er einstaklega falleg fjölbreytt og skemmtileg laxveiðiá í stórbrotnu umhverfi. Hún á upptök sín á Gaflfellsheiði, tugi kílómetra frá sjó og fellur svo til sjávar í Hvammsfjörð um 8km fyrir norðan Búðardal.