Veiði

Vikulegar veiðitölur úr laxveiðiánum

Karl Lúðvíksson skrifar
Íslenskur stórlax
Íslenskur stórlax Mynd: Árni Baldursson

Nú hafa nokkrar vinsælar laxveiðiár opnað og fyrsta vikulega samantektin á vefsíðu Landssambands Veiðifélaga komin á vefinn.

Tölurnar má finna á www.angling.is og það er skemmtilegt að fylgjast með því vikulega hvernig veiðin er í ánum og þeir veiðimenn sem eiga bókaða daga fylgjast gjarnan vel með sinni á. Á þessum fyrsta vikulista er Eystri Rangá aflahæst með 46 laxa en byrjunin þar hefur verið feyknagóð og eftir því sem við best vitum er allur laxinn sem hefur veiðst tveggja ára lax. Það hefur sést lax um alla á og þó svo að einstaka veiðistaðir hafi verið að gefa betur en aðrir fyrstu dagana er það sem af er ekkert annað en vísbending um að Eystri Rangá gæti verið að stefna í baráttuna um toppsætin í sumar. 

Það skal réttilega tekið fram að þegar þessi frétt er skrifuð vantar toppveiðisvæðið við Urriðafoss sem er klárlega efst á listanum með yfir 200 laxa, þar vantar líka Norðurá og Þverá/Kjarrá sem allar eru komnar yfir 50 laxa. Við bíðum spennt eftir uppfærslu á listanum hjá Landssambandinu.

Næstu ár á eftir eru Brennan með 23 laxa, Blanda 20 laxar, Miðfjarðará 20 laxar og Laxá í Leirársveit með 16 laxa. Við skulum líka hafa það í huga að tímabilið er rétt byrjað og fyrsti stóri straumur sumarsins er þann 24. júní en það er að öllu jöfnu sá straumur sem skilar til dæmis fyrstu stóru göngunum í árnar á vestur og suðurlandi. Það er ekki fyrr en í fyrstu og annari viku júlí sem það er með nokkuð góðri vissu spá fyrir um það hvernig sumarið gæti farið en eins og sagt er "so far, so good". Listann í heild sinni má finna á vef Landssambands Veiðifélaga en linkurinn er hér ofar í greininni.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.