Fallorka, sem sér Akureyrarbæ fyrir raforku, er í eigu Norðurorku. Norðurorka er svo að 98 prósenta hlut í eigu Akureyrarbæjar og er stjórn félagsins skipuð bæjarfulltrúum. Í fundargerð Norðurorku frá 26. september kemur fram að í vor hafi Norðurorku borist erindi frá orkufyrirtækinu Arctic Hydro sem er í eigu nokkurra íslenskra fjárfesta. Fyrirtækið lýsti yfir áhuga á kaupum á Fallorku eða skoðun á samruna.
Andra Teitssyni, framkvæmdastjóra Fallorku og bæjarfulltrúa L-listans á Akureyri, hafi verið falið að gera frumkönnun á valkostum sem mögulegir væru varðandi framtíð félagsins. Í lok ágúst var tilkynnt að Andri hefði hætt störfum hjá Fallorku og myndi hefja störf um mánaðamótin sem viðskipta- og þróunarstjóri hjá Orkusölunni.
Sunna Guðmundsdóttir, verkefnastjóri umhverfis- og loftlagsmála Norðurorku, hefur verið í starfinu í fjórar vikur á meðan unnið er að því að ráða í starfið. Skömmu eftir vistaskipti Andra til Orkusölunnar sendi Orkusalan erindi til Ásthildar Sturludóttur bæjarstjóra Akureyrarbæjar. Erindið var viðræður um kaup á Fallorku, að hluta til eða að öllu leyti.
Stjórn Norðurorku hafnaði hugmyndum um sölu á virkjunum Fallorku en fól Eyþóri Björnssyni forstjóra að láta greina fýsileika þess að selja söluhluta starfsemi Fallorku og/eða samruna Fallorku við önnur félög.
Hilda Jana Gísladóttir bæjarfulltrúi Samfylkingarinnar, í minnihluta bæjarstjórnar, og stjórnarmaður í Norðurorku segir málið vekja upp ýmsar spurningar. Hún vildi þó ekki tjá sig nánar um málið að svo stöddu.
Taflið snúist við
Í samtali við Vísi segir Andri að hann hafi tekið alla kosti og galla sölu Fallorku saman fyrir hönd bæjarins, bæði fyrir þremur árum og aftur nú í vor.
„Fyrir þremur árum þegar ég gerði þetta hefðu menn kannski frekar átt að segja að ég ætti að óttast um starfið mitt, með því að tala fallega um þá möguleika að selja félagið,“ segir Andri og vísar til þess að með sölu hefði hann mögulega misst starf sitt.
„Það hefur þá kannski snúist við núna, að ég ætti að hafa hvata til þess,“ segir Andri.
Hann segir vistaskiptin frá Norðurorku til Orkusölunnar hafa komið óvænt upp. Atvinnutilboð hafi borist í ágúst.
„Það hafði mjög stuttan aðdraganda þannig að þessar vangaveltur í vor og sumar tengjast því ekki á neinn hátt.“
Bæjarstjóra Akureyrarbæjar barst erindi frá Orkusölunni þar sem óskað er eftir viðræðum um kaup á Fallorku, aðeins þremur vikum eftir vistaskipti Andra. Fyrrverandi framkvæmdastjóra sem var nýbúinn að meta fýsileika á sölu félagsins eða hluta þess.
Veit manna mest um stöðu Fallorku
Þú hefur þá haft þessar upplýsingar allan hringinn?
„Að sjálfsögðu vissi ég, og veit enn, manna mest um rekstur og stöðu Fallorku. Hins vegar getur hver sem er nálgast ársreikninga félagsins á nokkrum sekúndum á netinu. Þannig það eru engin stór leyndarmál í þessu. Auðvitað, þó að ég hafi verið framkvæmdastjóri félagsins, þá er annað fólk sem mun taka ákvörðun um sölu Norðurorku.“
Fallorka var rekin með tapi á síðasta ári en Andri segir að öll orkufyrirtæki sýni taprekstur af og til og það komi í bylgjum.
„En auðvitað myndu menn vonast til að samstarf við eitthvað annað félag yrði til þess að efla Fallorku, með einhvers konar hagræðingu,“ segir Andri.
Hagsmunir sem ættu að gjalda varhug
Eru þessar viðræður nú byggðar á sama upplýsingagrunni og þú aflaðir á sínum tíma?
„Sá sem hefur samband við Fallorku í þessu tilfelli er forstjóri Orkusölunnar og það er að öllu leyti hliðstætt félag. Þannig að hann er að sjálfsögðu, óháð mér, í góðri aðstöðu til að átta sig á rekstrarumhverfi Fallorku í dag,“ segir Andri.
„Ég benti góðfúslega á það að fyrir þremur árum, þegar svipuð umræða var í gangi, að mínir hagsmunir hefðu átt að gjalda varhug við einhverri sameiningu þar sem starfið mitt væri þá í hættu. Í þeirri stöðu gerði ég minnisblað um alla þessa valkosti og ræddi, eftir því sem ég vil segja, á hlutlausan hátt um það. Var alveg óhræddur við að telja fram kosti ekki síður en galla.“
