Áfram verður spilað í 15-lotu kerfi í CS2, en fram kom í útsendingu Ljósleiðaradeildarinnar á þriðjudaginn að fyrri helmingur tímabilsins verði spilaður eftir því skipulagi.
Kvöldið hefst á Þór gegn FH-ingum. Bæði eru liðin með 4 stig en FH hefur þó forskot á Þórsara í lotumismuni. Liðið sem sigrar viðureignina skýtur sér því upp í annað sæti deildarinnar, en ekkert lið getur komist á toppinn í kvöld þar sem NOCCO Dusty hafa komið sér fyrir á toppi deildarinnar með 8 stig.
SAGA og Ármann mætast í öðrum leik kvöldsins. Ármann sitja eins og er í öðru sæti deildarinnar með 4 stig og besta lotumismun miðtöflunnar en SAGA hafa enn aðeins unnið eina viðureign á tímabilinu og hafa því tækifæri í kvöld á að blanda sér almennilega í miðjuslaginn.
Kvöldið endar svo á viðureign Ten5ion og ÍBV. Ten5ion eru með 4 stig í fimmta sæti stigatöflunnar og mæta botnliði ÍBV sem á enn eftir að finna sigur á tímabilinu. Eyjamenn munu þurfa að hafa sig alla við til að geta komist upp úr botnslagnum en Ten5ion geta með sigri stungið sér upp fyrir miðja töflu.
Bein útsending Ljósleiðaradeildarinnar verður á sínum stað á Stöð 2 Esports kl. 19:15 og sömuleiðis má sjá leikina í spilaranum hér fyrir neðan.
