ÍA batt enda á sigurgöngu FH

Leikurinn fór fram á Vertigo. ÍA tók hnífalotuna og kaus að hefja leikinn í vörn. FH hafði forskotið snemma í leiknum en þeir unnu fimm af fyrstu sex lotunum. Í erfiðri stöðu náði ÍA þó loksins að taka leik og gerði FH erfitt fyrir efnahagslega, staðan þá 2-5. 

Vörn ÍA þéttist þá nokkuð en J0n fékk AWP, sem virtist ná hugarfari ÍA manna enn hærra. Áfram féllu loturnar til ÍA-manna, en næstu tvær lotur fóru sömuleiðis þeim í hag. Sókn FH var þó ekki af baki dottin, en liðin deildu næstu lotum á milli sín.

FH þurfti að taka sparilotu í stöðunni 5-6 og ÍA nýtti tækifærið til að koma öllu í jafna stöðu, 6-6. Með nýja riffla í höndunum náði FH stjórn á leiknum að nýju og tók tvær lotur í röð. ÍA tók þó síðustu lotu fyrri hálfleiksins áður en skipt var um stöður.

Staðan í hálfleik: 7-8

FH-ingar hófu seinni hálfleik í vörn og byrjuðu með betri fótinn fyrir framan sig og tóku fyrstu tvær loturnar. ÍA tók svo sterkar sóknir með hnitmiðuðum árásum á sprengjusvæði Vertigo. Loks náðu ÍA-menn forystuni eftir 21. lotu þegar þeir komu stöðunni í 11-10 og FH virtist ekki hafa svörin við sóknarleik ÍA-manna. FH fann þó líflínu í 23. lotu með afar mikilvægum sigri, staðan þá 12-11.

Undir lok leiks áttu ÍA-menn stórleik þegar þeir giskuðu á að fara á B-svæði Vertigo þegar allir leikmenn FH voru á A-svæðinu, sem gaf þeim fría sprengjuplöntun og í raun fría lotu. Staðan þá 14-11 og FH-menn heldur betur í klandri. FH tókst ekki að finna svör við sóknarspili ÍA og sigur ÍA-manna því staðreynd.

Lokastaða: 16-11

ÍA er þar með búið að jafna FH að stigum með fjögur stig hvort fyrir sig. Því er ljóst að eina liðið með fullt hús stiga eftir þrjár umferðir er NOCCO Dusty.