Raun­verð í­búða á höfuð­borgar­svæðinu lækkað um 5,3 prósent

Þetta er meðal þess sem kemur fram í nýrri mánaðarskýrslu Húsnæðis- og mannvirkjastofnunar.

Íbúðaverð hefur haldist stöðugt að nafnvirði en vísitala íbúðaverðs á höfuðborgarsvæðinu hækkaði um 0,7 prósent í ágúst. Íbúðaverð á höfuðborgarsvæðinu hefur hækkað um tvö prósent á síðustu tólf mánuðum og raunverð því lækkað um 5,3 prósent.

Í nágrannarsveitarfélögum höfuðborgarsvæðisins lækkaði verðið um 1,4 prósent á milli mánaða og annars staðar á landinu um eitt prósent.  Raunverð íbúða hefur lækkað um 5,8 prósent í nágrenni höfuðborgarsvæðisins á síðustu tólf mánuðum en hækkað um 0,2 prósent annars staðar á landinu.

„Í ágúst komu 240 nýbyggðar íbúðir inn á markað á landinu öllu, samanborið við 398 íbúðir sem komu inn á markað í júlímánuði sem gerir 39,7% fækkun milli mánaða. Samtals hafa 2.276 nýbyggðar íbúðir komið inn á markað til þessa á árinu,“ segir í samantekt.

Tæplega 3.200 íbúðir eru nú til sölu á landinu, þar af 1.907 á höfuðborgarsvæðinu. 622 þeirra eru nýjar.

„Í nágrenni höfuðborgarsvæðisins er 691 íbúð til sölu, þar af eru 239 nýjar eða um 35% allra íbúða til sölu. Annars staðar á landinu eru 568 íbúðir til sölu þar af 73 nýjar eða um 13% allra íbúða til sölu.“

Í skýrslunni er einnig fjallað stuttlega um mannfjöldaþróun en þar segir meðal annars að ef sama þróun haldist áfram og verið hefur muni landsmenn telja 400.000 í árslok. Fjölgunin muni kalla á fleiri íbúðir.

„Í fyrra komu tæplega 3000 nýbyggðar íbúðir inn á markað á sama tíma og fjölgun landsmanna nam 11.510 einstaklingum. Fjölskyldustærð á Íslandi fyrir síðasta áratug er 2,53 íbúar á hverja íbúð að meðaltali en þó ber að nefna að fjölskyldustærð er örlítið breytileg eftir svæðum og byggðarlögum. Miðað við þetta meðaltal hefðu rúmlega 4.500 nýjar íbúðir þurft að koma inn á markað í fyrra til að mæta fjölgun mannfjöldans,“ segir í skýrslunni.