Alda kveður Sýn

Þetta segir í fréttatilkynningu frá Sýn.

„Alda hóf störf hjá Sýn í byrjun árs 2022 og hefur verið í lykilhlutverki í þeim breytingum sem félagið hefur farið í gegnum síðasta árið. Það er eftirsjá í Öldu en við óskum henni velfarnaðar á nýjum vettvangi og þökkum henni kærlega fyrir samstarfið“ sagði Yngvi Halldórsson, forstjóri Sýnar, í tilkynningunni.

Þá segir einnig í tilkynningunni að mannauður færist undir „Nýsköpun og Rekstur“ hjá Sýn. Það fækkar því um einn í framkvæmdastjórn Sýnar.

„Sýn er á sóknarvegferð sem felur í sér umfangsmiklar breytingar á þjónustu við viðskiptavini, endurbætur á innri ferlum, kerfum og rekstri. Mannauður spilar lykilhlutverk í þessari breytingarvegferð fyrirtækisins og því ánægjulegt að fá þá öflugu aðila sem þar starfa til liðs við sterkt teymi starfsmanna Nýsköpunar og rekstrar“, sagði Hulda Hallgrímsdóttir, framkvæmdastjóri Nýsköpunar og Rekstrar hjá Sýn, í tilkynningunni.

Reynslumikill stjórnandi

Alda var ráðin sem framkvæmdastjóri mannauðs í nóvember síðastliðnum en hafði fyrir það unnið sem mannauðsstjóri Sýnar síðan í mars 2022. Þar áður starfaði hún sem stjórnendaþjálfari í eigin fyrirtæki Vendum í ellefu ár. 

Fyrir það starfaði hún sem aðstoðarmaður rektors Háskólans í Reykjavík og þar á undan sem kynningar- og samskiptastjóri skólans. Alda starfaði sem viðskiptastjóri hjá fyrirtækinu SJÁ, fræðslustjóri VR og stundakennari við viðskiptadeild Háskóla Íslands.

Alda er menntaður stjórnmála- og atvinnulífsfræðingur frá Háskóla Íslands, lauk námi í stjórnendamarkþjálfun frá Opna Háskólanum í HR og Corporate Coach University ásamt því að vera með MBA gráðu frá HR.

Vísir er í eigu Sýnar.