Biðla til fólks að ganga ekki frá Vig­dísar­valla­vegi

Hjördís Guðmundsdóttir, samskiptastjóri Almannavarna, segir að mikið sé búið að fjalla um opnun nýrrar leiðar að eldgosinu í kjölfar frétta af því að Vigdísarvallavegur var opnaður í morgun. Það sé hins vegar ekki rétt að það sé komin ný gönguleið.

„Þessi nýja vending sem varð í morgun að Vigdísarvallarvegur var opnaður varð til þess að allur fréttaflutningur er eðlilega um að Vigdísarvallaleið sé opnuð. Ný leið að eldgosinu. Það er ekki,“ segir Hjördís.

Vegurinn opnaður að nýju

Vigdísarvallavegur hefur verið lokaður frá því í jarðhræringunum fyrir eldgosið. Nú hefur lögreglan opnað hann á ný en Hjördís segir að það sé ekki búið að opna neina gönguleið frá honum.

„Það sem gerist er að lögreglustjórinn á svæðinu metur það svo að Vigdísarvallarvegur verði opnaður.“

Úlfar Lúðvíksson lögreglustjóri á Suðurnesjum tjáði Vísi að vegurinn hefði verði opnaður. Fólk væri hins vegar þar á eigin ábyrgð, engin stikuð leið væri að gosinu og engir viðbragðsaðilar.

„Vegurinn er búinn að vera lokaður frá því það hrundi á veginn í jarðhræringum. Þá var hann lokaður vegna hættu. Lögreglustjórinn tók ákvörðun um að loka honum en Vegagerðin sá um framkvæmdina. Síðan kom eldgos og þá var talinn hætta á umferð þarna á svæðinu,“ segir Hjördís.

„Nú er það metið þannig að þau vilja opna veginn af því það er fullt af fólki sem notar veginn til útivista.“

„Það er eins og það sé ný leið en það er vegurinn sem er verið að opna. Það er ekki verið að opna nýja gönguleið, það er engin stikuð leið og það er miklu meiri hætta fyrir göngufólk að fara þá leið.“

Biðla til fólks að ganga Meradalaleið

Almannavarnir biðla til fólks að ganga ekki frá Vigdísarvallavegi heldur ganga Meradalaleið sem sé miklu öruggari og betri. Sú leið er um tuttugu kílómetrar fram og til baka.

Guðrún Hafsteinsdóttir dómsmálaráðherra er meðal þeirra sem talað hefur fyrir því að fundin verði styttri gönguleið fyrir fólk að gosinu. Nefndi Guðrún Vigdísarvelli sem möguleika á dögunum því þaðan væru aðeins fjórir kílómetrar að gossvæðinu, en ekki tíu. Gangan úr Meradölum er lengri en aftur á móti þægilegri yfirferðar.

„Við vildum biðla til fólks að fara hina leiðina af því þar eru bílastæði, vegur, björgunarsveitir, lögregla, klósett og allt sem þarf til þess að halda utan um þetta,“ segir Hjördís.

„Björgunarsveitin er með statistík yfir hversu miklu færri útköll voru vegna ökklabrota og meiðsla eftir að leiðin var stikuð á sínum tíma. Núna sjáum við fyrir okkur útköll og annað þar sem fólk metur það svo að það geti farið þessa leið af því hún er styttri. Hún er styttri í loftlínu en hin leiðin er mun betri.“

„Við biðlum líka til ferðaþjónustuaðila að velja hina leiðina. Vegurinn sjálfur tekur ekki rútur, hann hefur enga burði til að taka á móti mikill umferð,“ segir Hjördís að lokum.

Lélegt samband og bannað að leggja á grasflatir

Lögreglan á Suðurnesjum birti tilkynningu rétt fyrir fimm síðdegis. Þar segir að Vigdísarvallavegur henti ekki fólksbílum, þar sé lítið gsm-samband og víðast hvar ekki Tetra-samband. 

Þá segir einnig að mönnum sé frjáls för um veginn en „þeir sem aka veginn sjá að þar finnast fá bílastæði og bannað er að leggja bílum á grasflötum til að mynda á Vigdísarvöllum.“

Einnig er tekið fram að engar skipulagðar gönguleiðir liggi frá veginum eins og hafði áður komið fram.

Fréttin hefur verið uppfærð með tilkynningu lögreglunnar klukkan 16:50.