Ísland í riðli með Frökkum og spilað í Stavanger

Frakkar eru langsterkasta liðið í riðli Íslands en liðið er ríkjandi ólympíumeistari, silfurlið síðasta HM og varð í 4. sæti á EM í fyrra.

Slóvenar urðu í 8. sæti á EM í fyrra og í 17. sæti á HM fyrir tveimur árum.

Angóla er margfaldur Afríkumeistari og hefur átt fast sæti á HM en varð í 25. sæti á mótinu fyrir tveimur árum.

Dregið var í Gautaborg í dag. Ísland er á meðal þeirra 32 þjóða sem spila á HM eftir að IHF tilkynnti á mánudag að Ísland og Austurríki hefðu fengið boðssætin tvö sem sambandið sér um að úthluta.

Spila á sama stað og meistarar Þóris og gætu mætt þeim

Riðill Íslands verður spilaður í Stavanger í Noregi. Ef Ísland verður í hópi þeirra þriggja liða sem komast upp úr D-riðli fer liðið í milliriðil með þremur liðum úr C-riðli, og verður milliriðillinn spilaður í Þrándheimi.

Þar bíða ríkjandi heims- og Evrópumeistarar Noregs, undir stjórn Þóris Hergeirssonar, sem spila á heimavelli í Stavanger í C-riðli með Suður-Kóreu, Grænlandi og Austurríki.

A-riðill í Gautaborg

• Svíþjóð
• Króatía
• Kína
• Senegal

B-riðill í Helsingborg

• Svartfjallaland
• Ungverjaland
• Kamerún
• Paragvæ

C-riðill í Stavanger

• Noregur
• Suður-Kórea
• Grænland
• Austurríki

D-riðill í Stavanger

• Frakkland
• Slóvenía
• Angóla
• Ísland

E-riðill í Herning

• Danmörk
• Rúmenía
• Serbía
• Síle

F-riðill í Herning

• Þýskaland
• Pólland
• Japan
• Íran

G-riðill í Fredrikshavn

• Brasilía
• Spánn
• Úkraína
• Kasakstan

H-riðill í Fredrikshavn

• Holland
• Tékkland
• Argentína
• Kongó

Þetta verður í annað sinn sem Ísland spilar á HM kvenna í handbolta en liðið varð í 12. sæti á HM í Brasilíu árið 2011.

Leikstaðirnir á HM eru Herning og Frederikshavn í Danmörku, Stavanger og Þrándheimur í Noregi og Gautaborg og Helsingborg í Svíþjóð.

Eins og fyrr segir taka 32 þjóðir þátt á HM og verður spilað í átta fjögurra liða riðlum. Þrjú efstu liðin úr hverjum riðli komast áfram í milliriðla, þar sem tveir og tveir riðlar blandast saman, og verða milliriðlarnir því fjórir með samtals sex liðum í hverjum riðli. Tvö efstu liðin í hverjum milliriðli komast svo áfram í 8-liða úrslit.

Liðin sem komast í 8-liða úrslit eiga möguleika á að komast á Ólympíuleikana í París á næsta ári, því liðið sem verður heimsmeistari kemst beint þangað og liðin í 2.-7. sæti fá öruggt sæti í ólympíuumspilinu.