Spoti­fy segir upp hlað­varps­samningnum við Harry og Meg­han

Sagt er frá þessu í sameiginlegri yfirlýsingu frá Spotify og félagi þeirra Harry og Meghan þar sem þau hafi sammælst um halda „hvort í sína áttina“.

BBC segir frá því að Spotify hafi ákveðið að ráðast ekki í framleiðslu á annarri þáttaröð af Archetypes, en alls hafa verið framleiddir tólf þættir síðan í ágúst 2022.

Samningurinn var gerður síðla árs 2020 og var á sínum tíma metinn á 25 milljónir bandaríkjadala, um 3,5 milljarðar króna. Var þá stefnt að því að framleiða nokkrar þáttaraðir, en nú er ljóst að einungis verður um eina að ræða.

Samningurinn við Spotify var einn af nokkrum viðskiptasamningum sem Harry og Meghan gerðu eftir að þau létu af konunglegum skyldum og fluttust til Bandaríkjanna.

Í þáttunum Archetypes ræddi Meghan meðal annars við heimsfrægar konur á borð við tennisstjörnuna Serena Williams og söngkonuna Mariah Carey um þær staðalímyndir sem konur þurfa að búa við.

Harry og Meghan segjast stolt af hlaðvarpsþáttunum, en þættirnir unnu meðal annars til verðlauna sem besta hlaðvarp ársins á People's Choice Award í Los Angeles í desember.

Fréttirnar nú koma eftir að stjórnendur Spotify tilkynntu um að tvö hundruð manns í hlaðvarpdeild fyrirtækisins yrði sagt upp.