Twitter sagt láta undan þrýstingi Erdogan

Fyrirtækið tísti á föstudaginn á bæði ensku og tyrknesku að það takmarkaði nú aðgang að „sumu efni“ í Tyrklandi í gær, daginn fyrir forseta- og þingkosningar þar sem Recep Erdogan forseti berst fyrir pólitísku lífi sínu sem aldrei fyrr. 

Ekki kom fram hvaða tíst yrðu óaðgengileg í Tyrklandi eða af hverju en Twitter sagði að þau yrðu aðgengileg utan Tyrklands. Vísað var almennt til málsmeðferðar fyrir dómstólum.

Elon Musk, forstjóri og eigandi Twitter, virtist sjálfur staðfesta að stjórn Erdogan hefði still Twitter upp við vegg. Annað hvort fjarlægði miðillinn ákveðið efni eða lokað yrði fyrir Twitter í heild sinni.

Gagnrýnendur hafa síðan sakað Musk um tvískinnung þar sem hann hefur ítrekað lýst sjálfum sér sem einhvers konar tjáningarfrelsissinna án undantekninga (e. free speech absolutist). Það hefur hann notað til þess að réttlæta að hleypa fjölda notenda sem voru bannaðir fyrir brot á skilmálum Twitter aftur á miðilinn, þar á meðal alls kyns hægriöfgamönnum.

Ákvörðun núverandi stjórnanda Twitter um að lúffa fyrir tyrkneskum stjórnvöldum stingur ennfremur í stúf við baráttu fyrri stjórnenda gegn ritskoðunartilburðum Erdogans. Þegar Erdogan bannaði Twitter árið 2014 fór fyrirtækið með málið fyrir tyrkneska dómstóla sem sneru banninu á endanum við.

Jimmy Wales, stofnandi netalfræðiorðabókarinnar Wikipedia, var á meðal þeirra sem gagnrýndu Musk í gær. Wikipedia hafi sjálft barist fyrir tilverurétti sínum alla leið upp í Hæstarétt Tyrklands og haft sigur.

„Það er merking þess að líta á tjáningarfrelsið sem grundvallaratriði frekar en slagorð,“ tísti hann.

„Ef Elon segir núna „Okkur er sama um tjáningarfrelsi ef það kemur niður á tekjum“ þá ætti hann bara að segja það hreint út,“ sagði Wales.

Hneisa fyrir lýðræði og tjáningarfrelsi

Á meðal þeirra Tyrkja sem Twitter ritskoðar nú í Tyrklandi eru Muhammed Yakut, kúrdískur kaupsýslumaður og harður gagnrýnandi Erdogans, og Cevheri Güven, rannsóknarblaðamaður, að sögn vefmiðilsins Turkish Minute. Það er enskumælandi fréttavefur landflótta tyrkneskra blaðamanna í Þýskalandi.

Yakut þessi hefur sakað Erdogan og ráðherra hans um ýmis konar spillingu og haldið því fram að valdaránstilraun árið 2016 hafi verið sett á svið til þess að festa völd Erdogans í sessi. Hann hafði boðað frekari upplýsingar um það í gær.

„Þetta er hneisa við lýðræðið og tjáningarfrelsið að Twitter hafi látið undan fyrir Tayyip Erdogan,“ segir Güven við Turkish Minute. Güven býr sjálfur í Þýskalandi en Youtube-myndbönd þar sem hann ræðir um spillingu tyrkneskra stjórnvalda eru sögð njóta mikilla vinsælda.

Eygja færi á að fella Erdogan í fyrsta skipti í tuttugu ár

Kosningarnar í Tyrklandi í dag virðast ætla að vera þær mest spennandi frá því að Erdogan komst fyrst til valda fyrir um tuttugu árum. Kannanir benda til þess að Kemal Kilicdaroglu, leiðtogi sameinaðrar stjórnarandstöðunnar, eygi raunverulegan möguleika að bera sigurorð af forsetanum.

Kilicdaroglu hefur heitið því að snúa Tyrklandi af braut valdboðs og einræðis sem Erdogan hefur verið sakaður um.

„Tyrkland er land boða og banna. Þegar við verðum við völd verður Tyrkland land frelsis,“ sagði hann í viðtali í síðustu viku.