Páskaspá Siggu Kling - Ljónið

Gerðu engan að óvini þínum, umfaðmaðu það að vera svolítið lúmskur eins og þegar Ljónið þarf að ná í bráð sína. Ég hef sagt það oft áður að ef að Ljónið væri ekki til væri ekkert að frétta í samfélaginu. Til þess að hafa stjórnina á þér sjálfum og á þínu lífi þarftu að vita hvað það er sem skiptir í raun og veru máli og að henda aukaatriðunum beint í ruslið. Þú átt að veðja á það að þinn tími sé núna og að ekkert geti stöðvað þig í því sem þú vilt umlykja. Það er eins og þú lesir ekki alveg fólk og gefir fólki leyfi til þess að éta þig.

Það er er viss endurnýjun í gangi hjá þér bæði á sál og líkama. Þú ferð að hugsa svo sterkt um það sem þú lætur ofan í þig og hvernig þú klæðir þig. Þú ert að styrkja sjálfsmynd þína sem hefur mölbrotnað oftar en einu sinni.

Þú ert svo stórbrotin og merkileg týpa, en finnst þér það? Mundu að þú átt að vera stoltasta Ljónið í skóginum. Það hafa komið stundir undanfarið þar sem þú hefur gleymt að hlúa að því fólki sem á það skilið. Stolt og kraftur tengir ekki sjálfselsku, en til þess að netið virki sem er í kringum þig er svo mikilvægt að þú kveikir ljós í hjörtum þeirra sem tengjast þér, það er lausnin. Skrifaðu niður alla þá sem eru áhrifavaldar í þínu lífi og hafa gert þér gott, þetta er fólk sem er netið þitt, virkjaðu það aftur.

Knús og kossar, Sigga Kling