Sverrir Scheving nýr deildarstjóri Advania

Máni Snær Þorláksson skrifar 23. mars 2023 12:12

Sverrir Scheving Thorsteinsson er nýr deildarstjóri rafrænna viðskipta og skólalausna Advania. Hann mun leiða þróun á stafrænum skólalausnum fyrirtækisins og þróun á lausnum sem snúa að því að auðvelda íslenskum fyrirtækjum að stunda rafræn viðskipti.

Í tilkynningu frá Advania kemur fram að Sverrir hefur víðtæka reynslu af upplýsingatækni. Hann kemur til Advania frá Verði þar sem hann stýrði vöruteymi trygginga í samstæðu Arion banka og Varðar. Fyrir það leiddi hann upplýsingatæknisvið Varðar og þar á undan upplýsingatæknisvið OKKAR líftrygginga.

Einnig kemur fram að Sverrir lagði stund á atvinnuflugmannsnám við Flugskóla Íslands ásamt því að hafa lært tölvunarfræði við Háskólann í Reykjavík. Hann var tilnefndur til stjórnunarverðlauna Stjórnvísis árin 2021 og 2022 fyrir störf sín hjá Verði tryggingum.

Falur Harðarson, forstöðumaður sérlausna Advania, segir vera virkilega spenntur að fá Sverri til liðs við þróunatreymi fyrirtækisins. Þá segist Sverrir sjálfur vera stoltur og ánægður með að vera kominn til Advania.

„Það er margt vel gert hjá fyrirtækinu en ég veit líka að við getum gert enn betur. Ég hlakka til að takast á við skemmtileg og krefjandi verkefni með frábæru samstarfsfólki,“ er haft eftir Sverri í tilkynningunni.

Vistaskipti Upplýsingatækni

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.