N1 opnar Ísey Skyr Bar og Djúsí í Mosfellsbæ

N1 hefur opnað tvo nýja staði á þjónustustöð sinni í Háholti Mosfellsbæ, Ísey Skyr Bar og Djúsí. Framkvæmdir við opnunina hafa staðið yfir undanfarna mánuði og hefur nú verið opnuð ný og glæsilega stöð eftir framkvæmdir. Um er að ræða sjötta stað Djúsí og tíunda Ísey Skyr Bar staðinn, en þjónustustöð N1 í Háholti verður sú fimmta sem skartar bæði Djúsí og Ísey Skyr Bar.

Samhliða opnuninni var ráðist í breytingar á þjónustustöð N1 sem miða að því að stækka og bæta veitingarými, flæði og orkunýtingu. „Við erum mjög spennt að opna, sérstaklega þar sem Mosfellingar hafa lengi kallað eftir þessum hollari og ferskari valkostum og við ætlum nú aldeilis að svara því kalli,” segir Jón Viðar Stefánsson, forstöðumaður verslunarsviðs N1.

Djúsí stöðum hefur fjölgað hratt frá því þeir fyrstu voru opnaðir haustið 2021. Þeir eru nú sex talsins, á höfuðborgarsvæðinu sem og í Hveragerði og Borgarnesi, og stefnir N1 á að opna fleiri Djúsí staði um land allt í náinni framtíð. Fyrsti Ísey Skyr Bar staðurinn opnaði árið 2018 og eru þeir nú 10 talsins víða um land. Staðirnir bjóða báðir upp á holla og fljótlega rétti, Djúsí býður upp á safa, sjeika og samlokur og Ísey skyrskálar, boozt og safa.

Til að fagna opnuninni í Mosfellsbæ munu Djúsí og Ísey Skyr Bar bjóða upp á dúndur opnunartilboð í Háholti dagana 23. til 26. mars. Boðið verður upp á tveir fyrir einn af skálum, boozt og söfum hjá Ísey Skyr Bar og hjá Djúsí verður stór samloka og safi eða sjeik á 1.699 kr. og lítil samloka, safi eða sjeik á 1.299 kr.