Á­skor­enda­mótið í beinni: Barist um fyrstu sætin á Stór­meistara­mótinu

Aðeins átta af þeim sextán liðum sem hefja leik á Áskorendamótinu vinna sér inn sæti á Stórmeistaramótinu þar sem Dusty á titil að verja.

Alls eru átta leikir á dagskrá í kvöld og verður viðureign Dusty og Þórs sýnd í beinni útsendingu á Stöð 2 eSport og hér á Vísi. Dusty og Þór hafa barist um titlana seinustu ár, en hingað til hefur lið Dusty haft betur.

Áskorendamótið, eða Áskorendastig Stórmeistaramótsins, er sett upp í svokallað „swiss-format“ þar sem sextán lið hefja keppni og vinna þarf þrjá leiki til að tryggja sér sæti á Stórmeistaramótinu sjálfu. Liðin falla þó ekki úr leik þó þau tapi einum leik, heldur þarf að tapa þremur viðureignum til að falla úr leik. Myndin hér fyrir neðan útskýrir fyrirkomulagið ágætlega.

Nú er mótið komið á það stig að öll liðin hafa leikið tvo leiki. Tvö lið munu því vinna sér inn sæti á Stórmeistaramótinu í kvöld og tvö lið munu falla úr leik.

Eins og áður segir verður viðureign Dusty og Þórs í beinni útsendingu á Stöð 2 eSport og hér á Vísi í spilaranum hér fyrir neðan, en hægt er að fylgjast með hinum viðureignum kvöldsins á Twitch-hliðarrásum Rafíþróttasamtakana með því að smella á þær fyrir neðan spilarann.