Viðskipti innlent

Methagnaður Landsvirkjunar fyrst og fremst sóttur til stóriðjunnar

Kristján Már Unnarsson skrifar
Hörður Arnarson, forstjóri Landsvirkjunar.
Hörður Arnarson, forstjóri Landsvirkjunar. Egill Aðalsteinsson

Landsvirkjun á núna Kárahnjúkavirkjun skuldlausa sem og allar virkjanir byggðar fyrir hennar tíma. Forstjórinn segir methagnað fyrirtækisins fyrst og fremst sóttan til stóriðjunnar en ekki til almennings.

Í fréttum Stöðvar 2 kom fram að í 58 ára sögu sinni hafi Landsvirkjun aldrei hagnast jafn mikið og aldrei fært eiganda sínum jafnmikinn arð og núna. Lagt er til að ríkissjóður fái tuttugu milljarða króna arðgreiðslu af 45 milljarða króna hagnaði.

Á kynningarfundi forstjóra og fjármálastjóra í morgun kom fram að ytri aðstæður, eins og hátt álverð, hafi verið hagstæðar en stærsta áhrifaþáttinn í góðri afkomu segja þeir þó endursamninga við stóriðjuna.

„Við erum á margan hátt að uppskera, bæði frá þessum virkjunum sem hafa verið byggðar á síðustu 58 árum, og njótum mjög góðs af í dag, en einnig þessari vegferð sem við hófum fyrir tíu árum síðan að endursemja við okkar viðskiptavini. Það er að skila sér í langbesta rekstrarári Landsvirkjunar,“ segir forstjórinn Hörður Arnarson.

Forstjóri Landsvirkjunar ræðir um orkuskiptin á kynningarfundinum í morgun.Egill Aðalsteinsson

Athyglisvert er að á sama tíma og Landsvirkjun byggði Búðarhálsvirkjun, Þeistareykjavirkjun og Búrfellsvirkjun tvö þá snarlækkuðu heildarskuldir fyrirtækisins úr um 400 milljörðum króna árið 2010 niður í um 120 milljarða króna núna. Skuldsetningin núna er þannig minni en fjárfesting fyrirtækisins á síðustu tíu árum, að sögn Harðar.

„Þannig að það má segja það að allar virkjanir fyrir þann tíma eru núna skuldlausar,“ segir forstjórinn.

Og þar með talin Kárahnjúkavirkjun.

Úr vélasal Fljótsdalsstöðvar, sem áður var nefnd Kárahnjúkavirkjun.Skjáskot/Stöð 2

Því hefur stundum verið fleygt að almenningur sé að greiða niður orkuverð til stóriðjunnar.

„Ég hef ekki heyrt neinn segja það í mörg ár. Enda er það ekki rétt,“ segir forstjóri Landsvirkjunar. Stóriðjan greiði núna sambærilegt raforkuverð og tíðkist í helstu viðmiðunarlöndum.

„Það er mikilvægt að gera sér grein fyrir því að við erum ekki að sækja aukinn hagnað Landsvirkjunar til almennings heldur eru þetta fyrst og fremst með endursamningum við stóriðjuna.

Og í dag er staðan þannig að almenningur borgar sama verð og stóriðjan. Það er út af því að við höfum hækkað stóriðjuna en verð á almennum markaði hefur varla fylgt verðlagi,“ segir Hörður.

Hér má sjá frétt Stöðvar 2:


Tengdar fréttir

Á­kvarð­an­ir Lands­virkj­un­ar árið 2010 juku sjóð­streym­i um einn millj­arð dala

Ákvarðanir sem voru teknar í rekstri Landsvirkjunar fyrir meira en áratug, sem kölluðu á mikil „átök“ á þegar stórnotendur voru látnir greiða hærra raforkuverð, hefur haft afgerandi áhrif við að bæta afkomu og skuldastöðu félagsins og skilað því um einum milljarði Bandaríkjadala, jafnvirði um 145 milljarða króna, í auknu sjóðstreymi á tímabilinu. Forstjóri Landsvirkjunar segir að tækifæri séu til þess að endursemja við stóra viðskiptavini á komandi árum.

Landsvirkjun áformar meiri orkuöflun á fjórum stöðum

Ný orkuöflun Landsvirkjunar stefnir í að verða mjög umfangsmikil á næstu árum, að sögn forstjórans. Auk Hvammsvirkjunar áformar fyrirtækið stækkun virkjana á Þeistareykjum og við Sigöldu sem og vindorkulund við Búrfell.

Heimsmarkaðsverð á áli orðið ævintýralega hátt

Heimsmarkaðsverð á áli fór í gær í 3.850 dollara tonnið. Þetta er langhæsta álverð sögunnar. Álmarkaðir hafa heldur róast framan af degi og verðið sigið niður, fór niður í 3.740 dollara í morgun og var komið niður undir 3.500 dollara um hádegisbil.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×