Sýknuð í deilu um átján ára millifærslu

Tryggvi Páll Tryggvason skrifar 3. febrúar 2023 12:06

Sólveig Pétursdóttir fyrrverandi ráðherra og forseti Alþingis var sýknuð. Sömuleiðis Birkir Kristinsson fyrrverandi landsliðsmarkvörður í knattspyrnu. Alþingi/Getty-Lars Baron

Héraðsdómur Reykjavíkur hefur sýknað Birki Kristinsson, fjárfesti og fyrrverandi landsliðsmann í knattspyrnu, Sólveigu Pétursdóttur, fyrrverandi forseta Alþingis og auk fleiri, í deilu um átján ára millifærslu á hátt í fimmtíu milljónum.

Félagið Lyfjablóm ehf, stefndi Birki, Sólveigu fyrir hönd dánarbús eiginmanns hennar Kristins Björnssonar, Stefáni Bergssyni endurskoðanda og endurskoðendaskrifstofunni PWC, vegna millifærslunnar sem framkvæmd var árið 2005.

Millifærðar voru 46 milljónir króna af reikningi Lyfjablóms, sem þá hét Björn Hallgrímsson ehf, yfir á reikning eignarhaldsfélagsins Mercatura, í eigu Kristins. Nafni Björn Hallgrímssonar ehf. var síðar breytt í Lyfjablóm ehf.

Birkir var á þessum tíma starfsmaður Glitnis banka og var viðskiptastjóri Björns Hallgrímssonar ehf, auk annarra félaga sem tengdust eigendum þess félags.

Stefán Bergsson var löggildur endurskoðandi Björns Hallgrímssonar, og var þá starfsmaður og einn eiganda PWC.

Sólveigu, sem var dóms- og kirkjumálaráðherra frá 1999-2003 og forseti Alþingis frá 2005-2007, var stefnt fyrir hönd dánarbús eiginmanns hennar Kristins Björnssonar, sem sá um daglegan rekstur Björns Hallgrímssonar ehf. Hann lést árið 2015.

Eigendur þess félags voru eiginkona og fjögur börn Björns Hallgrímssonar og var sonur hans Kristinn í fyrirsvari fyrir félagið, sem fyrr segir. Eigandi Lyfjablóms nú er sonur Áslaugar Björnsdóttur, dóttur Björns.

Deilt um hvort krafan hafi verið gerð upp eða ekki

Umrædd deila snerist um það hvort að Björn Hallgrímsson ehf, nú Lyfjablóm ehf, hafi fengið endurgreiddar 46 milljónir króna sem Kristinn bað Birki um að millifæra af reikningi félagsins til að greiða yfirdráttarlán í nafni Mercatura, félags í eigu Kristins.

Í niðurstöðu Héraðsdóms Reykjavíkur er litið til fundargerðar Björns Hallgrímssonar ehf, sem dagsett var 5. júlí 2007, þar sem fram kemur að að hluthafar félagsins hafi samþykkt að selja félaginu tíu prósent í sjálfu sér fyrir 1,62 milljarða króna.

Birkir Kristinsson stóð lengi í markinu fyrir íslenska knattspyrnulandsliðið í knattspyrnu.Vísir/Vilhelm

Með fundargerðinni fylgir uppgjörsblað þar sem fram kemur hvernig félagið greiddi þess upphæð. Annars vegar var það gert með reiðufé, hins vegar með uppgjöri við ýmsar kröfur sem félagið átti útistandandi. Þar á meðal var umrædd millifærsla sem deilan snerist un.

Lögð voru fram skattaframtöl sem sýndu að söluhagnaður hluthafanna af þessum gerning var 403,5 milljónir króna. Telur héraðsdómur að sýnt hafi verið fram á að umrædd krafa hafi verið gerð upp með þessari sölu. Þetta hafi stjórnarmönnum félagsins átt að vera ljóst á sínum tíma.

Komst héraðsdómur því að þeirri niðurstöðu að sýkna bæri alla þá sem stefnt var vegna málsins. Þarf Lyfjablóm að greiða Birki og Sólveigu 3,5 milljónir í málskostnað, Stefáni 1,74 milljónir og PWC 1,4 milljónir.

Dómsmál Hrunið

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.