Viðskipti innlent

Tesla lækkar verð um 20 prósent: Hlakkar í sumum á meðan aðrir steyta hnefa

Viktor Örn Ásgeirsson skrifar
Tesla hefur lækkað verð á bílum sínum um allt að tuttugu prósent. Bæði hér á landi og annars staðar.
Tesla hefur lækkað verð á bílum sínum um allt að tuttugu prósent. Bæði hér á landi og annars staðar. Getty/Sullivan

Tesla lækkaði verð á bifreiðum sínum verulega í dag. Á Íslandi hefur verðið lækkað um allt að tuttugu prósent. Sumir telja sig svikna en aðrir taka verðlækkuninni fagnandi.

Greint var frá því í dag að rafbílaframleiðandinn hefði lækkað verð á bifreiðum, bæði í Evrópu og í Bandaríkjunum. Lækkunin er mismikil eftir tegundum og útfærslu bílanna en í Danmörku nam lækkun allt að þrjátíu prósentum.

Danska ríkisútvarpið greinir frá því að fjölmargir væru pirraðir yfir fréttunum. Bílasalar sem sætu á notuðum Teslum væru í öngum sínum. Aðrir, sem væru nýbúnir að kaupa Teslur, hefðu getað sparað sér fleiri hundruð þúsund.

Tuttugu prósenta lækkun á Íslandi

Eins og fyrr segir lækkaði verð hér á landi um allt að tuttugu prósent ef miðað er við söluverð með virðisaukaskatti. Viðskiptablaðið greinir frá því að nýjasta tegundin, jepplingurinn Model Y, hafi lækkað mest bíla eða um fimmtung. Þannig fari ódýrasta útfærsla bílsins úr 8,1 milljón niður í 6,5. 

Verð á fólksbílnum Tesla Model 3 lækkar öllu minna. Ef miðað er við ódýrustu útfærsluna nemur lækkunin um 200 þúsund krónum.

Fjörugar umræður sköpuðust í Facebook-hópnum „Tesla eigendur og áhugafólk“ í dag vegna lækkunarinnar. Einn bölvaði því að hafa keypt bíl í desember. Hefði hann keypt bílinn í dag væri hann um 421 þúsund krónum ódýrari. Aðrir taka lækkuninni fagnandi.

Friðrik Pálsson, eigandi Hótel Rangár, hefur fylgst vel með rafbílavæðingunni hér á landi. Hann var í hópi fjögurra sem riðu á vaðið og voru þeir fyrstu til að flytja Teslur hingað til lands. Hann segir í samtali við fréttastofu að lækkunin geti ekki talist annað en jákvæð.

„Alveg stórkostlegt“

„Mér finnst eiginlega bara alveg stórkostlegt. Þetta eru ótrúlegar fréttir í rauninni, að það sé hægt í þessari stöðu sem nú er í gangi að hægt sé að lækka verð á bílum. Ég teldi miklu meiri ástæðu til þess að vera óánægður ef að bílarnir hefðu hækkað það mikið í verði að það yrði ómögulegt fyrir þá sem ætluðu sér að kaupa eftir áramót að kaupa þá ekki.“

Hann segir að Tesla virðist hafa greitt upp upphaflegan hönnunarkostnað á bílunum og því tekist að lækka verð. Framleiðandinn hafi hingað til breytt útliti Teslunnar lítið en hugbúnaðurinn sé þó uppfærður mjög reglulega. Eigendur eldri bíla sitji því ekki í súpunni.

„Ég vona að þetta verði til þess að virkilega hleypa lífi í rafmagnsbílaflota Íslendinga. Mér finnst líklegt að þetta ýti enn frekar undir það að við hröðum þessari umbyltingu í umferð landsmanna, þessi orkuskipti í samgöngum sem okkur dreymir um.“


Tengdar fréttir

Tesla Model Y mest seldi bíll ársins á Íslandi

Toyota var með flestar seldar bifreiðar á árinu eða 3.395 eintök. Alls voru nýskráðar 23.287 bifreiðar á árinu. Það eru sambærilegar tölur og í fyrra þegar 22.133 ökutæki voru nýskráð. Tesla Model Y var mest selda einstaka undirtegundin með 1.035 eintök. Rafmagn varð hlutskarpast allra orkugjafa þegar upp var staðið. Upplýsingar eru fengnar af vef Samgöngustofu.

Gær­dagurinn sá versti í átta mánuði hjá Tesla

Virði hlutabréfa rafbílaframleiðandans Tesla var í gær lægra en það hefur verið í meira en tvö ár. Fjárfestar í Tesla óttast að Musk einbeiti sér of mikið að samfélagsmiðlinum Twitter.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×