Lagði Adidas í deilu um rendurnar

Tryggvi Páll Tryggvason skrifar 13. janúar 2023 14:20

Thom Browne í stuði. Það glittir í umræddar rendur á einum af sokk hans. Vísir/Vilhelm

Bandaríski fatahönnuðurinn Thom Browne lagði þýska íþróttafatnaðarrisann Adidas í hugverkadeilu um notkun á röndum í hönnun á fatnaði. Þetta er niðurstaða dómstóls í New York í Bandaríkjunum. Browne og Adidas hafa áður deilt um notkun á röndum.

Adidas höfðaði mál gegn Browne vegna notkunar hans á fjórum láréttum röndum sem gjarnan eru á flíkum sem hann hannar og hafði hug á því að krefjast átta milljón dollara í skaðabætur, ríflega 1,1 milljarðs. Adidas hefur um árabil notað þrjár láréttar rendur til að auðkenna ýmsar flíkur þýska risans.

Browne, sem er þekktur fyrir að hanna fatnað í dýrari kantinum, hélt því meðal annars fram að ólíklegt væri að neytendur myndu rugla saman merkjunum, ekki síst vegna þess að hann notaðist við fjórar rendur, Adidas þrjár. Lögfræðingar hans héldu því einnig fram að kúnnahópur Browne og Adidas væri ekki sambærilegur. Að auki væru rendur algengar í hönnun.

Deilur Browne og Adidas má rekja fimmtán ár aftur í tímann. Þá samþykkti hann að hætta að nota þrjár láréttar rendur í hönnunarvörum sínum, og bætti við einni í viðbót. Frá þeim tíma hefur veldi Browne þó stækkað gríðarlega, auk þess sem að það hefur í auknum mæli hannað íþróttafatnað.

Kviðdómendur í málinu voru á sama máli og Browne og hefur málinu því verið vísað frá.

Bandaríkin Tíska og hönnun Höfundarréttur

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Mest lesið

Fleiri fréttir