Forstjóri Play spáir einu besta ári íslenskrar ferðaþjónustu

Kristján Már Unnarsson skrifar 10. janúar 2023 21:57

Birgir Jónsson er forstjóri flugfélagsins Play. Arnar Halldórsson

Flugfélagið Play hyggst fljúga til hátt í fjörutíu áfangastaða í sumar og bætast þrettán nýir við. Þotum verður fjölgað úr sex í tíu og spáir forstjórinn því að þetta ár verði eitt það besta frá upphafi í íslenskri ferðaþjónustu.

Það er í raun ótrúlega stutt síðan félagið kom inn á markaðinn. Það var í byrjun sumars árið 2021 sem Play fór í fyrsta áætlunarflugið. Núna er félagið að sigla inn í þriðja rekstrarárið. Í fréttum Stöðvar 2 var fjallað um vöxt Play og rætt við Birgi Jónsson forstjóra.

„Þetta hefur bara vaxið samkvæmt áætlunum. Við byrjuðum á þremur vélum. Vorum með sex í fyrra og verðum með tíu á þessu ári. Fljúgum til hátt í fjörutíu áfangastaða núna 2023. Þannig að þetta verður ansi skemmtilegt ár,“ segir Birgir.

Leiðakerfi Play með nýjustu áfangastöðum.Play

Nýjasta kortið yfir leiðakerfi Play sýnir gróskuna en Birgir segir þrettán nýja áfangastaði bætast við ár. Nýir í sumar eru Toronto, Álaborg, Árósar, Billund, Düsseldorf, Varsjá, Stokkhólmur, Hamborg, Aþena og Porto. Þá hafa Madrid, Barcelona og Alicante bæst við sem heilsárstaðir. Og Birgir gefur til kynna að fleiri áfangastaðir eigi eftir að bætast á kortið á árinu.

„Já, við erum með nokkra ása uppi í erminni og munum bara spila þeim út þegar tækifæri gefst á markaðnum.“

Hann segir að vel hafi gengið að ráða og þjálfa upp nýjar áhafnir en starfsmannafjöldi Play hefur snaraukist.

„Það voru held ég 45 manns sem unnu hérna fyrir tæpum tveimur árum og við verðum 550 á þessu ári. Þannig að heimilið er að stækka ansi mikið.“

Airbus A321-þota Play á Keflavíkurflugvelli.Vilhelm Gunnarsson

Félagið notast eingöngu við Airbus-þotur og verður með sex A320 og fjórar lengri A321, sem Birgir segir yngsta flugflota Evrópu. Hann segir að með þessum fjölda sé félagið komið í ákveðið jafnvægi.

„Við hugsum þetta auðvitað bara þannig að ef við sjáum tækifæri, þá förum við á eftir þeim. En ég á svo sem alveg von á því að félagið vaxi. En við ætlum að taka róleg og yfirveguð skref.“

Hann segir þróun olíuverðs helstu ógnina en er engu að síður bjartsýnn.

„Flugfélög almennt séð hafa verið í ákveðnum mótvindi síðustu misseri og síðasta ár var erfitt með olíuhækkanir og annað.

En við erum ekki að sjá annað en að Ísland til dæmis sem áfangastaður verði mjög vinsæll á þessu ári. Ég held að íslensk ferðaþjónusta sé að fara inn í eitt af sínum bestu árum bara frá upphafi. Þannig að við sjáum bara mikla eftirspurn og mikla grósku.

En að sjálfsögðu þarf að fara varlega og renna með öruggum hætti í hylinn,“ segir Birgir Jónsson, forstjóri Play.

Hér má sjá frétt Stöðvar 2:

Play Fréttir af flugi Ferðamennska á Íslandi Keflavíkurflugvöllur Airbus

Tengdar fréttir

Play hefur áætlunarflug til Toronto í júní

Flugfélagið Play hefur hafið miðasölu á flugsætum til Toronto í Kanada en áætlunarflug þangað hefst þann 22. júní. Toronto er fimmti áfangastaður Play í Norður-Ameríku. Flogið verður alla daga vikunnar á Hamilton International flugvöll.

10. janúar 2023 11:27

Bætir við sig þremur áfangastöðum á Jótlandi og einum í Þýskalandi

Flugfélagið Play mun frá miðjum júní á næsta ári fljúga sex sinnum í viku milli Keflavíkurflugvallar til Jótlands í Danmörku. Flugferðirnar skiptast á milli þriggja flugvalla – Billund, Árósa og Álaborgar. Þá verður einnig flogið til Düsseldorf í Þýskalandi.

5. janúar 2023 09:05

Play til Stokkhólms og Hamborgar

Flugfélagið Play hefur hafið miðasölu í flugferðir frá Keflavíkurflugvelli til Stokkhólms í Svíþjóð og Hamborgar í Þýskalandi. Forstjóri flugfélagsins hefur fulla trú á því að farþegar muni flykkjast til borganna.

7. nóvember 2022 10:01

Hefja áætlunarflug til Varsjár

Flugfélagið Play hyggst hefja sölu á miðum á áætlunarflugi til Varsjár, höfuðborgar Póllands í apríl.

2. desember 2022 13:22

Munu fljúga til Aþenu næsta sumar

Flugfélagið Play hefur hafið miðasölu á áætlunarferðum til grísku höfuðborgarinnar Aþenu. Áætlað er að fyrsta ferðin verði farin 2. júní 2023 en flogið verður tvisvar í viku, á mánudögum og föstudögum, út október 2023.

19. október 2022 09:06

Play sækir 2,3 milljarða frá stærstu hluthöfunum

Stjórn flugfélagsins Play hefur safnað bindandi áskriftarloforðum frá tuttugu stærstu hluthöfum félagsins upp á 2,3 milljarða. Forstjóri félagsins segir tilganginn vera að efla félagið fyrir komandi vöxt og styrkja lausafjárstöðu þess.

4. nóvember 2022 08:30

Rúmlega þrjú þúsund sóttu um hjá Play

Alls sóttu um þrjú þúsund manns um stöður hjá Play þegar flugfélagið auglýsti eftir 150 flugliðum og 55 flugmönnum á dögunum.

7. október 2022 09:58

Bætir við sig öðrum áfangastað í Portúgal

Flugfélagið Play hefur hafið sölu á áætlunarferðum til borgarinnar Porto í Portúgal.

6. október 2022 10:32

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.