Viðskipti erlent

Raf­mynta­bransinn í úlfa­kreppu á nýju ári

Kjartan Kjartansson skrifar
Rafmyntir féllu skarpt í verði í fyrra í skugga gjaldþrota og fjársvikamála. Sum fyrirtæki byrjuðu þetta ár á því að draga saman seglin vegna áframhaldandi erfiðleika á markaðinum.
Rafmyntir féllu skarpt í verði í fyrra í skugga gjaldþrota og fjársvikamála. Sum fyrirtæki byrjuðu þetta ár á því að draga saman seglin vegna áframhaldandi erfiðleika á markaðinum. Vísir/Getty

Samdráttur, uppsagnir og lögsóknir hafa einkennt fyrstu daga nýs árs í rafmyntabransanum sem varð fyrir hverju högginu á fætur öðru í fyrra. Tveir fyrrverandi forstjórar fallinna fyrirtækja standa frammi fyrir sak- og málsóknum.

Rafmyntalánveitandinn Genesis Global Capital hóf árið á því að segja upp tæpum þriðjungi starfsfólks síns og Silvergate bank, sem hefur sérhæft sig í viðskiptum með rafmyntir, tilkynnti að innistæður hefðu dregist mikið saman. 

Hlutafé í Silvergate féll um meira en 43 prósent í verði eftir að viðskiptavinir tóku út meira en átta milljarða dollara af innistæðum sínum þar sem þeim var órótt eftir fall rafmyntakauphallarinnar FTX. Saksóknarar í FTX-málinu sögðu skiptadómi á miðvikudag að þeir hefðu lagt hald á bankareikninga sem tengdust kauphöllinni hjá bæði Silvergate og Farmington State-bankanum.

Silvergate ætlar að fækka starfsfólki sínu um 40 prósent og segja upp um 200 manns.

Reuters-fréttastofan segir að erfiðleika fyrirtækjanna megi rekja til falls FTX sem var tekin til gjaldþrotameðferðar í nóvember.

Sam Bankman-Fried, stofnandi og fyrrverandi forstjóri FTX, er ákærður fyrir stórfelld fjársvik, peningaþvætti og brot á lögum um framlög til stjórnmálaflokka í tengslum við gjaldþrotið. Lykilstarfsmenn fyrirtækisins eru sagðir vinna með saksóknurum sem rannsaka málið.

Þá tilkynnti dómsmálaráðherra New York-ríkis í gær að hann hefði stefnt Alex Mashinsky, stofnandi og fyrrverandi forstjóra rafmyntalánveitandans Celsius Network, og krafist þess að honum yrði bannað að stýra fyrirtæki í ríkinu. 

Mashinsky er sakaður um að hafa svikið milljarða dollara út í viðskiptavinum sínum með því að markaðssetja fyrirtækið sem öruggan valkost við hefðbunda banka á sama tíma og hann lét viðskiptavini ekki vita af því að hann hefði tapað hundruð milljóna dollara á áhættusömum fjárfestingum. Celsius fór á hausinn í fyrra.

Celsius lánaði Alameda Research, vogunarsjóði í eigu Bankman-Frieds, um milljarð dollara árið 2021 og 2022. Bankman-Fried er sakaður um að hafa fært milljarðra dollara af inneignum viðskiptavina FTX til Alameda til þess að halda fyrirtækinu á floti.


Tengdar fréttir

Stofnandi FTX lýsir yfir sak­leysi

Fallinn stofnandi rafmyntafyrirtækisins FTX, Sam Bankman-Fried sagðist fyrr í dag saklaus fyrir rétti í New York ríki í Bandaríkjunum.

Raf­mynta­grafarar í kröppum dansi

Lánveitendur hafa gengið að veðum í hundruð þúsundum véla sem eru notaðar til þess að grafa eftir rafmyntum í kjöfar falls rafmyntakauphallarinnar FTX í síðasta mánuði. Rafmyntagrafarar geta nú margir ekki staðið í skilum á lánum sínum þegar þrengir að þeim úr nokkrum áttum.

Raf­mynta­keisarinn sem reyndist nakinn

Stofnandi rafmyntakauphallarinnar FTX var hylltur sem einhvers konar kennifaðir rafmyntarbransans og viðraði sig upp við stórstjörnur og stjórnmálamenn. Allt að milljón fjárfesta og viðskiptavina sitja nú uppi með milljarða dollara tap eftir skyndilegt hrun fyrirtækisins.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×