Viðskipti innlent

Hugsar daglega hvort hann eigi ekki að leggja árar í bát

Kolbeinn Tumi Daðason skrifar
Gísli Matthías Auðunsson rak Skál með Birni Steinari Jónssyni og Gísla Grímssyni. Hann hefur síðan selt sig úr fyrirtækinu og rekur í dag Slippinn og Næs í Vestmannaeyjum.
Gísli Matthías Auðunsson rak Skál með Birni Steinari Jónssyni og Gísla Grímssyni. Hann hefur síðan selt sig úr fyrirtækinu og rekur í dag Slippinn og Næs í Vestmannaeyjum.

Gísli Matthías Auðunsson, matreiðslumaður kenndur við Slippinn í Vestmannaeyjum og Næs, segist íhuga það daglega að hætta í veitingarekstri. Rekstrarumhverfið sé orðið yfirþyrmandi lýjandi. Hann spyr hvað sé til bragðs að taka?

Gísli Matthías er af mörgum álitinn einn fremsti kokkur landsins. Því til mars má finna lofsamlegar umsagnir gesta á veitingahúsum hans í gegnum tíðina. Hann segist í færslu á Facebook afar stoltur yfir því að hafa aldrei farið í þrot þrátt fyrir að hafa rekið sex veitingastaði í gegnu árin.

„Alltaf er reynt að finna leiðir til þess að reksturinn gangi upp. Meira að segja reyndum við hjá Slippnum í raunininni of mikið í COVID með því að opna einnig skyndibitastaðinn ÉTA undir sömu kennitölu að útaf honum féllum við ekki undir neina styrki hjá hinu opinbera þegar samansöfnuð velta var ekki 40% undir árinu áður heldur „aðeins“ 33%,“ segir Gísli Matthías.

Stressaður fyrir sumrinu

Nú standi fyrir dyrum algjör krísa í veitingarekstri.

„Kostnaður er orðinn allt of hár á öllum vígstöðum og þó ég sé almennt mjög lausnamiðaður þá bara sé ég ekki hvernig dæmið eigi að ganga upp hjá veitingastöðum. Nú er komið nýtt ár og laun eru búin að hækka mikið á undanförnum misserum, öll lán komin með rosalega háa greiðslubyrði vegna hárra vaxta og maður bíður núna stressaður eftir sumrinu til þess að fara að byrja að borga af covid láninu sem var tekið sem átti aldeilis að bjarga málunum.“

Þá hafi vöruinnkaup aldrei verið dýrari. Þar komi til aðstæður sem veitingaaðilar hafi enga stjórn á.

„Hvað er til bragðs að taka? Hækka verð? Ef þau yrðu hækkuð eins mikið og þau þurfa og í samræmi við allan kostnað myndi engin koma, það hefðu fáir efni á því. Maður hugsar daglega hvort maður eigi ekki bara að fara leggja árar í bát og fara hreinlega að gera eitthvað annað,“ segir Gísli.

Reksturinn sé orðinn svakalega lýjandi.

Fleiri tengja við orð Gísla

„Ég elska að elda og gera góðan mat - að skapa góðar upplifanir en reksturinn og allar erfiðu ákvarðanirnar gleypa alla gleði sem fylgir rekstrinum. Hvað er til bragðs að taka?“

Gísli talar ekki fyrir daufum eyrum. Meðal þeirra sem tengja við skrif Gísla er Íris Ann Sigurðardóttir sem um áramótin lokaði dyrunum á CooCoo's Nest á Granda.

„Vá hvað við skiljum þig vel og við lentum í því sama í Covid og niðurstaðan var að við ákváðum að selja.

Rekstrarumhverfið fyrir minni veitingastaði og sérverslanir er nánast ómögulegt. Samt er þetta sem setur helstan svip á bæjarlífið sem ferðamenn og lókallinn fær að njóta góðs af. Eitthvað þarf klárlega að breytast.“


Tengdar fréttir

Krefjast þess að fá að senda áfengi heim með mat ekki seinna en núna

Jakob E. Jakobsson eigandi Jómfrúarinnar í Lækjargötu er einn fjölda veitingamanna á Íslandi sem krefjast þess að frumvarp dómsmálaráðherra sem myndi heimila netverslun með áfengi fái flýtimeðferð og samþykkt í ljósi aðstæðna sem uppi eru í samfélaginu.

Íslenskt en samt framandi

Að smjörsteikja lambakjöt með furunálum og gufusjóða rótargrænmeti í heyi heyrir til fullkomlega eðlilegrar matreiðslu þegar Gísli Matthías Auðunsson, kokkur á Mat og drykk á Grandagarði og Slippnum í Eyjum, er annars vegar.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×