Förðunarráð frá Söru Dögg fyrir hátíðirnar

Myndirnar tók Aldís Pálsdóttir, Alexandra Johansen sá um hár og módel er Brynja Bjarnadóttir. Allur fatnaður er frá Andrea By Andrea.

1. Mælir með tvöfaldri húðhreinsun

Áður en þú byrjar að farða þig er mikilvægt að vera með hreina húð. Ég mæli alltaf með tvöfaldri húðhreinsun, setja svo toner/andlitsvatn, augnkrem, rakaserum og svo rakakrem. Rakakremið er líka einstaklega mikilvægt í rútínunni þegar kuldinn er mikill. 

Með því að undirbúa húðina vel fyrir förðun þá verður húðin heilbrigðari, áferðin á farðanum verður fallegri og förðunin endist einnig mun lengur. Fyrir þá sem hafa auka tíma þá set ég alltaf á mig góðan rakamaska kvöldinu áður en ég farða mig til þess að fá auka ljóma, raka og boost í húðina.

2. Rauður einkennir jólin

Ég elska desember þegar kemur að förðun en þá er svo gaman að leika sér með glimmer, rauða varaliti og fleiri hátíðlegar vörur. Ég myndi segja að jólin í ár eins og oft áður einkennast af rauða litnum. Það eru til ótrúlega margir mismunandi rauðir tónar þannig að allir ættu að geta fundið það sem hentar þeim. 

Rauðir varalitir finnst mér alltaf ótrúlega klassískir og fallegir í kringum jólin og að toppa þá með rauðu naglalakki setur punktinn yfir i-ið. 

Varðandi húðina þá finnst mér ljómandi húð með fallegum mildum skyggingum og kinnalit alltaf fallegt á móti rauðum vörum. Mér finnst einnig fallegt að hafa augun með léttri skyggingu, kremuðum ljómandi augnskugga (glimmer á áramótunum) og toppa svo með eyeliner og augnhárum fyrir þá sem vilja smá extra.

3. Primer og settingsprey lykilatriði

Til þess að förðunin endist sem lengst mæli ég með góðum primer en hann fyllir upp í fínar línur og svitaholur þannig að húðin virðist sléttari en einnig gefur hann mun betri ending á förðuninni. Ég mæli einnig með Setting Sprey en það er einskonar rakasprey sem þú úðar yfir andlitið þegar þú ert búin að farða þig og förðunin endist þá lengur. Ég myndi segja að góður primer og gott setting sprey sé lykilatriði til þess að förðunin endist frá morgni til kvölds án þess að þú þurfir að laga þig.

Fyrir þá sem ætla að nota rauða eða dökka varaliti þá mæli ég með að finna varablýant í svipuðum lit og setja yfir allt varasvæðið, þá verður blýanturinn eins og primer og varaliturinn endist mun lengur.

Þeir sem vilja nota glimmer þá er til ótrúlega sniðug vara sem heitir Glitter Primer og er frá Nyx Professional Makeup en sú vara er fullkomin til að festa glimmer og kemur í veg fyrir að það fari út um allt.

Hér má sjá vörurnar sem notaðar voru við förðunina: