Neytendur

Banna aug­lýsingar Verna um „erki­týpurnar“ Teit, Hebu og Svölu

Atli Ísleifsson skrifar
Tryggingafélagið Verna er til húsa í Ármúla.
Tryggingafélagið Verna er til húsa í Ármúla. Vísir/Egill

Neytendastofa hefur bannað tryggingafélaginu Verna að birta auglýsingar sínar þar sem fólk er sagt hafa stórlækkað reikninga sína með því að hafa fært viðskipti sín til félagsins. Auglýsingarnar eru taldar villandi, ósannaðar og brjóta gegn lögum.

Frá þessu segir á vef Neytendastofu. Þar kemur fram að stofnuninni hafi borist ábendingar vegna auglýsingar og markaðssetningar Verna á þar sem auglýstur var allt að 120 þúsund króna sparnaður með því að færa sig yfir til Verna.

Varðaði ábendingin fullyrðingarnar:

  • „Teitur lækkaði tryggingarnar sínar um 120 þúsund krónur á ári með því að færa sig yfir til Verna“, 
  • Heba lækkaði tryggingarnar sínar um 54 þúsund krónur á ári með því að færa sig yfir til Verna“; og 
  • Svala lækkaði tryggingarnar sínar um 74.500 krónur á ári með því að færa sig yfir til Verna“.

Engin svör bárust 

Neytendastofa fór í kjölfarið fram á að tryggingafélagið myndi sanna fullyrðingarnar.

„Í svörum Verna kom fram að við þróun smáforritsins hefði verið notast við erkitýpur með tilteknar þarfir og einkenni fyrir tiltekinn markhóp kvenna og karla á tilteknum stað í lífinu. Fyrir birtingu auglýsinganna hafi verið haft samband við raunverulega einstaklinga sem pössuðu við þessar skilgreindu erkitýpur og kannað hvort og hve mikið viðkomandi hefðu lækkað í verðum. Upplýsingar um fjárhæð sparnaðar voru tilteknar en engar upplýsingar um hvernig upphæðirnar voru tilkomnar eða á hvaða grundvelli sparnaðurinn miðaðist við.

Neytendastofa óskaði eftir frekari skýringum varðandi hinn auglýsta sparnað á iðgjöldum. Ekkert svar barst frá Verna.Vísir/Egill

Neytendastofa óskaði eftir frekari skýringum varðandi hinn auglýsta sparnað á iðgjöldum s.s. ítarlegri upplýsingar um þennan mögulega sparnað á iðgjöldum, hvaða tryggingaliði verið væri að miða við og hvernig þessi heildarsparnaður væri fundinn út, lið fyrir lið. Ekkert svar barst,“ segir á vef Neytendastofu.

Óljóst hvernig „sparnaðurinn“ væri tilkominn

Stofnunin komst að þeirri niðurstöðu að miðað við framlögð gögn félagsins væri óljóst hvernig hinn auglýsti sparnaður væri tilkominn eða hvort hann væri raunverulegur og ekki hefði tekist að sanna fullyrðingarnar.

„Fullyrðingarnar væru afdráttarlausar og því líklegt að neytendur leggi þann skilning í auglýsingarnar að Verna bjóði í öllum tilvikum upp á sambærilegar en ódýrari tryggingar en önnur tryggingafélög. Því taldi stofnunin að með birtingu umræddra fullyrðinga hafi félagið jafnframt veitt villandi upplýsingar um helstu einkenni og verð veittrar þjónustu félagsins.“

Með vísan í lög um eftirlit með viðskiptaháttum og markaðssetningu var Verna því bannað að birta umræddar fullyrðingar.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×