Innlent

Verða að bæta undir­liggjandi rekstur borgarinnar

Ellen Geirsdóttir Håkansson og Kjartan Kjartansson skrifa
Einar Þorsteinsson, formaður borgarráðs, í viðtali um hagræðingaraðgerðir borgarinnar í kvöldfréttum Stöðvar 2 í gærkvöldi.
Einar Þorsteinsson, formaður borgarráðs, í viðtali um hagræðingaraðgerðir borgarinnar í kvöldfréttum Stöðvar 2 í gærkvöldi. Vísir/Stöð 2

Bæta verður undirliggjandi rekstur Reykjavíkurborgar til þess að stöðva margmilljarða króna hallarekstur hennar, að sögn Einars Þorsteinssonar, formanns borgarráðs. Hann segir tillögur um að lækka laun borgarfulltrúa popúlisma.

Borgarstjórnarmeirihlutinn kynnti 92 hagræðingaraðgerðir til þess að bregðast við miklum hallarekstri A-hluta Reykjavíkurborgar á fimmtudag. Rekstur A-hlutans var neikvæður um rúmlega ellefu milljarða króna fyrstu níu mánuði ársins, langt umfram þann 1,6 milljarða króna halla sem reiknað hafði verið með.

Á meðal hagræðingaraðgerðanna er draga úr fjárfestingum upp á fimm milljarða á næstu árum,  lækka fundarkostnað borgarstjórnar, fresta ráðningum á skrifstofu borgarstjóra og borgarrita, fækka listsýningum og bjóða út mat fyrir leikskóla borgarinnar.

Hildur Björnsdóttir, oddviti Sjálfstæðisflokksins, gagnrýndi áformin í gær. „Kroppað“ væri í reksturinn hér og þar en aðgerðirnar væru mátt- og haglausar. Skera ætti niður útgjöld til matarkaupa fyrir leikskólabörn um hundrað milljónir króna en lítið gert til þess að hrófla við fínum móttökum í Höfða og ráðhúsinu.

„Ráðist beint í að skerða þjónustu við fólkið í borginni í stað þess að ráðast á yfirbygginguna og rekstrarvandann í þessari stjórnsýslu,“ sagði Hildur í viðtali við Stöð 2 í gær.

Popúlismi að leggja til lækkun launa þeirra hæst launuðu

Einar sagði þessar kveðjur Hildar kaldar í ljósi þess að hagræðingaraðgerðirnar væru þær mestu frá hruni í viðtali í kvöldfréttum Stöðvar 2 í gærkvöldi. Gerð væri hagræðingarkrafa um eitt prósent á öll svið auks þess að reksturinn yrði ekki verðbættur.

Sú hagræðingarkrafa ofan á aðgerðirnar 92 og ýmsar umbótaáætlarnir sem ráðist yrði í ættu að skila um fimmtán milljarða króna hagræðingu yfir þriggja ára tímabil. Hagræðingin næði jafnmikið til miðlægrar stjórnsýslu inni í ráðhúsinu og til annarra hluta borgarkerfisins.

„Stóri vandinn er þessi og heildarsýnin verður að vera þessi, við erum með 15,3 milljarðahalla á rekstri A-sjóðs og við verðum að bæta undirliggjandi rekstur borgarinnar. Það gerum við með því að fara í margháttaðar aðgerðir inn í kerfið, hagræðum inni í kerfinu en reynum að koma í veg fyrir að það bitni á borgarbúum. Við stöndum vörð um framlínuþjónustuna, skólana og velferðarþjónustuna. Þannig getum við bætt þjónustuna,“ sagði hann.

Spurður að því hvort að hæst launuðu borgarstarfsmennirnir, þar á meðal borgarfulltrúar, væru tilbúnir að taka á sig skerðingu sagðist Einar þeirrar skoðunar að kjörnir fulltrúar ættu ekki að hræra í laununum sínum sjálfir.

„Þetta er bara popúlismi að koma með einhverjar svona tillögur,“ svaraði hann.

Hvað varðaði útboð á mat til leikskóla borgarinnar sagði Einar það koma sér á óvart að Sjálfstæðisflokkurinn legðist gegn því. Nú þegar hefðu 47 af 63 leikskólum borgarinnar ákveðið sjálfir að bjóða út matinn í staðinn fyrir að vera sjálfir með eldhús. Sagði Einar það skynsamlega fjármálastjórn að ráðast í sameiginleg innkaup fyrir leikskólana.


Tengdar fréttir

„Sýndaraðgerðir“ sýni að meirihlutinn ætli sér ekki að taka á vandanum

Borgarstjóri segir verðbólgu og fjórðu bylgju Covid meginástæður þess að rekstrarniðurstaða Reykjavíkurborgar hafi verið neikvæð um 11,1 milljarð króna á fyrstu níu mánuðum ársins. Fulltrúi Sjálfstæðisflokksins segir að meirihlutinn ætli sér ekki að taka á rekstrarvandanum þar sem hagræðingaraðgerðir séu ekkert nema sýndaraðgerðir.

Brugðist við halla­rekstri borgarinnar: Færri sýningar og boðsmiðar en meiri tími í beðunum

Ráðast á í margvíslegar aðgerðir til að bregðast við miklum hallarekstri A-hluta Reykjavíkurborgar. Þar á meðal á að ráðast í 92 hagræðingaraðgerðir sem fela meðal annars í sér færri sýningar á Listasafni Reykjavíkur og færri boðsmiða á safnið. Skoða á mögulega sölu á bílastæðahúsum auk þess sem að útlit er fyrir að unglingar í Vinnuskólanum þurfi að eyða meiri tímum í beðum borgarinnar en fyrri sumur.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.