Viðskipti erlent

Musk hleypir nær öllum sem voru bannaðir aftur á Twitter

Kjartan Kjartansson skrifar
Öfgamenn, tröll og eineltisseggir hugsa sér nú gott til glóðarinnar þar sem þeim verður öllum hleypt aftur á Twitter í næstu viku.
Öfgamenn, tröll og eineltisseggir hugsa sér nú gott til glóðarinnar þar sem þeim verður öllum hleypt aftur á Twitter í næstu viku. AP/Gregory Bull

Öllum þeim notendum á Twitter sem hafa verið bannaðir fyrir nær hvaða sakir sem er verður hleypt aftur á samfélagsmiðilinn í næstu viku. Elon Musk, eigandi Twitter, ákvað þetta eftir óformlega skoðanakönnun.

Musk lýsti aðgerðinni sem „sakaruppgjöf“ og spurði fylgjendur sína hvort þeir væru fylgjandi henni eða ekki. Þegar 72% höfðu lýst sig fylgjandi lýsti hann því yfir að bönnuðu notendunum yrði endurreistir í næstu viku en þó ekki þeir sem hefðu brotið lög eða staðið fyrir „svívirðilegum amapóstum“.

AP-fréttastofan segir að skoðanakannanir sem þessar séu langt því vísindalegar og að auðvelt sé fyrir tölvuyrki (e. bot) að hagræða niðurstöðunum. Musk hafði sama háttinn á þegar hann ákvað að hleypa Donald Trump, fyrrverandi Bandaríkjaforseta, aftur á Twitter um síðustu helgi. Trump hafði verið bannaður fyrir að hvetja til árásarinnar á bandaríska þinghúsið 6. janúar í fyrra.

Sérfræðingar í netöryggi segja að ákvörðun Musk um að endurreisa bönnuðu reikningana muni leiða til vaxandi áreitni, hatursorðræðu og upplýsingafalsi á Twitter. 

Musk virðist taka það álit heimildarmanna AP óstinnt upp því hann svaraði tísti fréttastofunnar með fréttinni í kaldhæðnislegum tóni og sagði Twitter aldrei geta keppt við AP í upplýsingafalsi. 

Rasismi, gyðingahatur og annar sori hefur þegar aukist á Twitter eftir kaup Musk á miðlinum, meðal annars vegna þess að glundroða sem stórfelldar uppsagnir hafa skapað. Musk sjálfur tísti nýlega hómófóbískri samsæriskenningu um árás á eiginmann forseta fulltrúadeildar Bandaríkjaþings en eyddi því síðar án útskýringa eða afsökunarbeiðni.

Stórir auglýsendur hafa yfirgefið Twitter fyrir vikið þar sem þeir vilja ekki láta bendla vörumerki sín við vafasamt efni.

Síðustu vikur hefur Musk ítrekað tekið þátt í umræðum með notendum af ysta hægrijaðrinum og tekið undir umkvartanir þeirra um að fyrri stjórnendur Twitter hafi ritskoðað þá. Fyrir þingkosningarnar í Bandaríkjunum fyrr í þessum mánuði hvatti Musk fylgjendur sína til þess að kjósa repúblikana.


Tengdar fréttir

Leyfir al­menningi að kjósa um endur­komu Trump

Elon Musk, eigandi Twitter og stofnandi Tesla, hefur boðið almenningi að kjósa um hvort Donald Trump fyrrverandi Bandaríkjaforseti ætti að snúa aftur á Twitter. Á tólf klukkutímum hafa rúmlega tíu milljónir manna kosið. 





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×