Rafíþróttir

Ljósleiðaradeildin verður hluti af Evrópukeppni í Counter Strike

Hjörtur Leó Guðjónsson skrifar
Ljósleiðaradeildin í CS:GO er orðin hluti af Evrópukeppninni CCT.
Ljósleiðaradeildin í CS:GO er orðin hluti af Evrópukeppninni CCT.

Ljósleiðaradeildin er orðin hluti af Evrópukeppninni CCT í CS:GO. Deildin fékk boð í CCT vegna góðra innviða, gæða í útsendingum og stöðugleika í keppnisumhverfinu.

Í fréttatilkynningu Ljósleiðaradeildarinnar kemur fram að íslenska leiðin sé að bjóða upp á gæðastarf og að boðið í CCT sé viðurkenning á gæðum og styrk Ljósleiðaradeildarinnar.

Þá kemur einnig fram að þetta sé ein stærsta viðurkenning sem íslensk lið hafa fengið í Counter Strike og að það sé mikill heiður. Nú stefni deildin enn lengra og á að vaxa enn frekar á alþjóðlegum vettvangi.

Með þessu fá liðin í Ljósleiðaradeildinni nú tækifæri til að mæta bestu liðum Evrópu og sýna sig á stóra sviðinu. Það mun gera lið og leikmenn deildarinnar sýnilegri á alþjóðlegum vettvangi.

Aldrei jafn mikið í húfi fyrir íslensk lið eins og nú

Aron Ólafsson, framkvæmdarstjóri Rafíþróttasamtaka Íslands, segir að boð sem þessi komi ekki að sjálfu sér. Gríðaleg vinna liggur að baki þess að fá slíkt boðskort og að líklega hafi aldrei verið jafn mikið í húfi fyrir íslensku liðin í Ljósleiðaradeildinni.

„Svona boðskort koma ekki af sjálfu sér. Þessi viðurkenning er fyrst og fremst viðurkenning fyrir þá vinnu sem hefur farið í að byggja upp rafíþróttainnviði á Íslandi,“ sagði Aron í samtali við Vísi.

„Vinnan og dugnaðurinn frá starfsmönnum og keppendum hefur verið svo mikil undanfarin ár. Í dag er deildin okkar svo skemmtileg að við erum með eitt mesta áhorf sem þekkist í þessum landsdeildum.“

„Svo til að draga þetta saman þá erum við mjög stolt af þessu og við höldum áfram að bjóða upp á frábærar útsendingar með spennandi keppni og áframhaldandi stöðugleika og innviðauppbyggingu. Ég get ekki beðið eftir að sjá íslensk lið halda áfram að fá tækifæri erlendis. Það má segja að það hafi aldrei verið jafn mikið í húfi fyrir íslensku liðin, en nú er Ljósleiðaradeildin, úrvalsdeildin í CS:GO, stökkpallur upp í tvær erlendar keppnir,“ sagði Aron að lokum




Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.