Atvinnulíf

Væri líklegast uppátækjasamur starfsmaður á plani í Næturvaktinni

Rakel Sveinsdóttir skrifar
Stefanía Guðrún Halldórsdóttir framkvæmdastjóri hjá Eyrri Venture Management vann einu sinni í sjoppu á Hólmavík og fannst fátt skemmtilegra þar en að smúla planið. Hún sæi sjálfan sig alveg sem uppátækjasaman karakter í Næturvaktinni, sem mögulega myndi smúla fleira en planið ef þyrfti.
Stefanía Guðrún Halldórsdóttir framkvæmdastjóri hjá Eyrri Venture Management vann einu sinni í sjoppu á Hólmavík og fannst fátt skemmtilegra þar en að smúla planið. Hún sæi sjálfan sig alveg sem uppátækjasaman karakter í Næturvaktinni, sem mögulega myndi smúla fleira en planið ef þyrfti. Vísir/Vilhelm

Stefanía Guðrún Halldórsdóttir, framkvæmdastjóri hjá Eyri Venture Management, er í því átaki núna að lesa meira á kvöldin en leggja símann frá sér. Ef hún væri karakter í Næturvaktinni telur hún líklegt að hún væri uppátækjasamur starfsmaður á plani.

Í kaffispjalli um helgar er rætt við fólk í ólíkum störfum. Við spyrjum alltaf um það hvenær fólk vaknar á morgnana, hvað er það fyrsta sem það gerir þá og hvenær fer fólk að sofa. Við spyrjum líka um skipulagið og helstu verkefnin í vinnunni.

Hvenær vaknar þú á morgnana?

„Ég vakna um klukkan hálf sjö við vekjara sem líkir eftir sólarupprás, engin hljóð, bara ljós, þá er eins og það sé vor alla daga.“

Hvað er það fyrsta sem þú gerir á morgnana?

„Ég fer beint í útiföt og sæki smalahundinn Sám sem fer með mér í morgungöngu í hálftíma. Þegar við komum heim vekjum við Katrínu, tíu ára sem fær smalahund og mömmu sína upp í rúm til sín í knús. Fjölskyldan mætir svo öll í morgunmat sem Snorri, eiginmaður minn hefur útbúið meðan ég og Sámur kláruðum morgungönguna.“

Nefndu karakter úr Næturvaktarseríunum sem þú myndir helst samsvara þér við?

Ég væri líklega starfsmaður á plani, sem unglingur vann ég í sjoppu á Hólmavík og það skemmtilegasta sem ég gerði var að spúla þvottaplanið. 

Slíkur karakter gæti átt það til að láta það eftir sér að spúla fleiri en bara planið ef þörf væri á.“

Dagarnir hjá Stefaníu fara oft í annars vegar að skoða fyrirtæki til að fjárfesta í en hins vegar að sitja stjórnarfundi í sprotafyrirtækjum sem Eyrir Venture Management hefur þegar fjárfest í. Outlook heldur algjörlega  um skipulagið og þegar Stefanía þarf næði til að sinna verkefnum, bókar hún tíma í dagatalið fyrir sjálfan sig.Vísir/Vilhelm

Í hvaða verkefni ertu að vinna helst í þessa dagana?

„Það sem mér finnst skemmtilegast við vinnuna mína er að það er enginn dagur eins, flestir daga snúast um að skoða ný sprotafyrirtæki sem eru að leita af fjárfestum. Ekkert fyrirtæki er eins og ég er alltaf að læra eitthvað nýtt.

Áður en við ákveðum hvort við ætlum að fjárfesta í fyrirtækjum hefur átt sér stað mikil greiningarvinna sem innifelur bæði vinnu við að lesa sig í gegnum ýmis skjöl en líka það sem mér þykir áhugaverðast, en það er að taka samtöl við þau sem standa að baki fyrirtækinu, greinendur og við aðra hagaðila.

Eftir að við fjárfestum, þá tekur við vinna með félögunum við að byggja upp og stækka. Hefðbundinn dagur hjá mér er því oftast blanda þessu tvennu að skoða ný sprotafyrirtæki og svo sitja stjórnarfundum í fyrirtækjum sem hafa fengið fjárfestingu.

Partur af deginum mínum fer einnig alþjóðleg samskipti eins og mál tengdum viðskiptahraðal MIT háskólans í Boston sem við hjá Eyri Vexti erum í samstarfi við. Í gegnum það verkefni styðjum við sprotafyrirtækin sem við höfum fjárfest í, í þeirri vegferð að stækka og ná árangri á alþjóðamörkuðum.“

Hvernig skipuleggur þú þig í vinnu?

„Ég er undir stöðugri handleiðslu Outlook dagatalsins sem stjórnar deginum mínum með harðri hendi en ég passa upp á að bóka allt sem kemur til mín þar inn þá næ ég frekar að gera það sem ég ætla mér þá vikuna. Þetta snýst dálítið um aga en þegar fólk hefur samband við mig í gegnum allt mögulegt, Linkedin, Facbook eða símtöl, en allt fer inn í Outlook hjá mér. 

Sama á við um þegar ég þarf tíma til að vinna ákveðin verkefni í næði, þá bóka ég tíma hjá sjálfri mér. Á föstudögum hef ég það fyrir venju að fara yfir skipulag næstu viku til að vera viss um að ég nái að undirbúa næstu viku þegar þess þarf.“

Hvenær ferðu að sofa á kvöldin?

„Þó ég sé nagli, þá fer ég hallærislega snemma að sofa því ég er kvöldsvæf, fer upp í rúm fyrir klukkan ellefu að lesa og reyni að vera ekki í símanum. Það er átakið núna, að lesa meira og leggja símann frá mér.“


Tengdar fréttir

Missir sig þegar kemur að lakkrís og öllu með lakkrísbragði

A manneskjan Anna Katrín Halldórsdóttir, framkvæmdastjóri Alfreðs, segir það stundum reyna á samningatæknina að vera með unglinga á heimilinu þegar allir vilja fara í sturtu á morgnana. Anna viðurkennir að hreinlega elska lakkrís og allt sem honum tengist.

Hafnar því alfarið að vakna snemma vegna gráu háranna

Björn Ingi Hrafnsson blaðamaður hafnar því alfarið að það hafi eitthvað með gráu hárin eða aldurinn að gera, hversu snemma hann vaknar á morgnana. Þó í átaki að reyna að sofna fyrr á kvöldin enda B-týpa að eðlisfari.

Hlakkar til á kvöldin að drekka kaffið í góðu skapi á morgnana

Morgunhaninn Sigríður Dögg Auðunsdóttir fréttamaður á RÚV og formaður Blaðamannafélags Íslands, viðurkennir að hafa forðast ljósvakamiðla í mörg ár af ótta við að mistakast í beinni útsendingu. Öryggið kom þó á endanum en að fara í sjónvarp var áskorun.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.