Viðskipti erlent

Mætti með vask í höfuðstöðvar Twitter

Samúel Karl Ólason skrifar
Auðjöfurinn Elon Musk birti í gær myndband af sér í höfuðstöðvum Twitter með vask.
Auðjöfurinn Elon Musk birti í gær myndband af sér í höfuðstöðvum Twitter með vask. AP/Twitter

Auðjöfurinn Elon Musk er líklegur til að eignast samfélagsmiðlafyrirtækið Twitter formlega í þessari viku. Í gær mætti hann í höfuðstöðvar fyrirtækisins í San Francisco með vask í fanginu. Frestur Musks til að kaupa fyrirtækið á um 44 milljarða dala rennur út á morgun og virðist sem yfirtakan sé langt komin.

Musk skrifaði í apríl undir samning um að kaupa Twitter á 44 milljarða dala, eða 54,2 dali á hlut. Skömmu síðar lýsti hann þó því yfir að hann væri hættur við kaupin.

Eftir miklar deilur, málaferli og viðræður um afslátt tilkynnti Musk að hann myndi standa við kaupsamninginn.

Frá því Musk skrifaði undir samninginn hefur virði hlutabréfa Twitter lækkað töluvert. Undanfarna daga hefur það þó hækkað nokkuð og er nú nálægt því að vera 54 dalir á hlut, eins og kaupsamningurinn segir til um.

Musk birti í gær myndband af sér með áðurnefndan vask í fanginu. 

Við myndbandið skrifaði hann á ensku: „Entering Twitter HQ – let that sink in!“ sem á íslensku þýðir: „Mættur í höfuðstöðvar Twitter. Meltið það!"

Tilgangur vasksins er nokkuð óljós og er útlit fyrir að Musk hafi haldið á honum eingöngu til að segja brandara, ef svo má kalla. Orðið sink þýðir í þessu samhengi „vaskur“ eða „handlaug“.

Musk hefur einnig breytt texta á Twitter-síðu sinni og stendur þar nú: „Chief Twit“, sem lauslega þýðir „Yfir-tístari“.

Við myndbandið skrifaði Musk einnig að hann hefði hitt mikið af áhugaverðu fólki í höfuðstöðvunum. AP fréttaveitan bendir á að Musk hafi áður haldið því fram að breyta ætti höfuðstöðvunum í neyðarskýli fyrir heimilislausa vegna þess hve margir starfsmenn Twitter ynnu heiman frá.

Þá hafa fregnir borist af því að Musk ætli sér að segja upp stórum hluta starfsmanna fyrirtækisins.

Bankar byrjaðir að senda Musk peninga

Auðjöfurinn ætlar að taka Twitter af markaði. Hann fjármagnar stóran hluta yfirtökunnar með bankalánum en hefur einnig selt hlutabréf í rafbílafyrirtækinu Tesla. Mestur auður Musks, sem er talinn auðugasti maður heims, er bundinn í hlutabréfum Tesla.

Þá hafa greinendur sagt að við yfirtöku Musks muni skuldir Twitter stigmagnast og vaxtagreiðslur muni hækka úr um það bil 51 milljón dala í fyrra í rúman milljarð á næsta ári.

Sjá einnig: Skuld­ir Twitt­er stig­magn­ast við yf­ir­tök­u Musks

Wall Street Journal segir að bankarnir sem fjármagna kaup Musks á Twitter séu byrjaðir að senda honum peninga en um þrettán milljarða dala er að ræða. Á meðal bankanna sem lána Musk eru Morgan Stanley, Bank of America og Barclays.

Frá því í apríl hefur Musk selt hlutabréf í Tesla fyrir rúma fimmtán milljarða dala og er það talið vegna kaupa hans á Twitter. Enn er þó nokkuð óljóst hvaða fjárfestar það eru sem munu koma að kaupunum með Musk og hvað þeir ætla að leggja til yfirtökunnar.


Tengdar fréttir

Ye kaupir eigin samfélagsmiðil

Listamaðurinn Ye, eða Kanye West, ætlar að kaupa Parler, sem er umdeildur og áhrifalítill samfélagsmiðill, skömmu eftir að hann var bannaður á Twitter og Instagram vegna færslna sem innihalda gyðingahatur. Ye segir samfélagsmiðla ekki halda uppi málfrelsi og því hafi hann keypt eigin miðil.

Tesla Semi kominn í framleiðslu og Pepsi efst á lista

Fimm árum eftir að Tesla kynnti rafflutningabílinn sinn er hann kominn í framleiðslu og væntanlegur til viðskiptavina. Pepsi fær fyrstu bílana ef marka má tíst frá Elon Musk, framkvæmdastjóra Tesla.

Fær frest til að semja endanlega um Twitter-kaupin

Eftir að hafa barist fyrir því að kaupunum á samfélagsmiðlinum Twitter yrði rift fær auðjöfurinn Elon Musk nú frest til 28. október til að fjármagna kaupin. Umsamið kaupverð er 44 milljarðar bandaríkjadala en upphaflega stóð til að málið yrði tekið fyrir eftir 11 daga. Allar líkur voru taldar á því að Musk yrði gert að standa við upphaflegan samning en hann kveðst nú hafa vilja til að greiða, hann vanti aðeins tíma.

Musk vildi þrjátíu prósenta afslátt

Fulltrúar Elons Musks og Twitter eiga enn í viðræðum um kaupsamkomulag auðjöfursins á samfélagsmiðlafyrirtækinu. Viðræður um að Musk fengi allt að þrjátíu prósenta afslátt á kaupverðinu sem segir til um í kaupsamningi sem hann skrifaði undir í apríl.

Twitter sam­þykkir kaup­til­boð Musk

Samfélagsmiðlafyrirtækið Twitter hefur ákveðið að samþykkja kauptilboð auðjöfursins Elon Musk fyrir 41 milljarð bandaríkjadala. Tíðindin bárust í tilkynningu frá fyrirtækinu rétt í þessu.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.