Viðskipti erlent

Musk vildi þrjátíu prósenta afslátt

Samúel Karl Ólason skrifar
Eftir að honum var neitað um þrjátíu prósenta afslátt er Musk sagður hafa farið fram á tíu prósent. Honum var einnig neitað um þann afslátt.
Eftir að honum var neitað um þrjátíu prósenta afslátt er Musk sagður hafa farið fram á tíu prósent. Honum var einnig neitað um þann afslátt. EPA

Fulltrúar Elons Musks og Twitter eiga enn í viðræðum um kaupsamkomulag auðjöfursins á samfélagsmiðlafyrirtækinu. Viðræður um að Musk fengi allt að þrjátíu prósenta afslátt á kaupverðinu sem segir til um í kaupsamningi sem hann skrifaði undir í apríl.

Elon Musk, sem á og rekur fyrirtæki eins og Tesla og Spacex, kom öllum á óvart á mánudaginn þegar hann lýsti því yfir að hann ætlaði að standa við upprunalega kaupsamninginn en útlit var fyrir að málið myndi enda fyrir dómstólum.

Hann átti að fara í skýrslutöku í dag en henni var frestað vegna yfirlýsingar Musks.

Musk skrifaði í apríl undir samning um að kaupa Twitter á 44 milljarða dala, eða 54 dali á hlut. Skömmu síðar lýsti hann þó því yfir að hann væri hættur við kaupin. Hann sakaði stjórn Twitter um að hafa ekki útvegað sér gögn sem hann bað um varðandi raunverulegan fjölda falskra reikninga, eða botta, á Twitter.

Auðjöfurinn sagði að þær upplýsingar væru nauðsynlegar svo hann gæti metið raunverulegt verðmæti Twitter.

Þetta gerði hann þó eftir að hafa skrifað undir kaupsamning og hófust málaferli. Þau eru ekki komin langt á veg en sérfræðingar eru að mestu sammála um að útlitið hafi ekki verið gott fyrir Musk..

Sjá einnig: Selur í Tesla af ótta við þvinguð kaup á Twitter

Musk hefur viljað fá afslátt en viðræður þar að lútandi hafa ekki skilað árangri.

New York Times segir að Musk hafi viljað allt að þrjátíu prósenta afslátt. Þá myndi hann kaupa fyrirtækið á um 31 milljarð dala. Í gær var það metið á 39,2 milljarða. Hann bað svo um tíu prósenta afslátt en fékk það ekki heldur.

Því lýsti hann því yfir á mánudaginn að hann væri tilbúinn til að kaupa Twitter á upprunalega verðinu, 44 milljarða dala, og samþykkti stjórn Twitter það.

Samkvæmt heimildum Wall Street Journal er viðræðum þó ekki lokið, þó Musk hafi gefið upp vonina á afslætti. 

Meðal þess sem viðræðurnar snúast nú um er hvaða skilyrði þurfi að uppfylla svo báðir aðilar samþykki að fella lögsóknir sínar niður og fjármögnun Musks á samfélagsmiðlafyrirtækinu.


Tengdar fréttir

Musk til í að standa við kaupin

Elon Musk segist til í að standa við fyrirhuguð kaup á samfélagsmiðlinum Twitter. Musk hafði áður neitað að standa við kaupin en tvær vikur eru í að fyrirhuguð réttarhöld vegna meintra samningsbrota fari fram. Stjórn Twitter ætlar að hugsa málið.

Musk má nota yf­ir­lýs­ing­ar upp­ljóstr­ar­ans gegn Twitt­er

Auðjöfurinn Elon Musk má breyta lögsókn sinni gegn Twitter og nota uppljóstranir fyrrverandi öryggisstjóra fyrirtækisins. Þetta ákvað dómari sem er með málið á sínu borði í dag en hann neitaði beiðni Musks um að aðalmeðferð málsins yrði frestað frá október til nóvember.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×