Mikilvægasta stundin í dag

„Eiginlega óbreytt staða. Það er mögulegt að við höfum séð toppinn af rennslinu undan jökli í nótt. Það er erfitt að sjá það því við erum að meta það út frá jarðskjálftamælum. Við erum ekki með neinn rennslismæli upp við Skeiðarárjökul. Við búumst við, af því gefnu að við höfum séð toppinn, að við sjáum flóðatoppinn í Gígjukvísl niðri við brú mögulega í dag,“ segir starfsmaður eftirlitsspáar Veðurstofunnar í samtali við fréttastofu. 

Á mælum Veðurstofunnar sjást engin merki um aukna jarðskjálftavirkni eða gosóróa. Mikilvægasti tíminn er þegar Grímsvötn tæmast en það mun gerast á svipuðum tíma og flóðatoppurinn er niðri við brúnna hjá Gígjukvísl.