Innlent

Vill fá af­­sökunar­beiðni frá Ingu, Guð­­mundi og konunum þremur

Bjarki Sigurðsson skrifar
Jón Hjaltason vill fá afsökunarbeiðni.
Jón Hjaltason vill fá afsökunarbeiðni. Vísir/Vilhelm

Frambjóðandi Flokks fólksins á Akureyri vill fá afsökunarbeiðni frá forystu flokksins og konunum þremur sem hafa sakað hann og tvo aðra menn um óásættanlega framkomu. Hann segist ekki efast um niðurstöður óháðrar rannsóknar.

Jón Hjaltason, sagnfræðingur og frambjóðandi Flokks fólksins á Akureyri, ritar grein í Fréttablaðið í dag þar sem hann reynir að útskýra atburðarásina sem átti sér stað á Akureyri undir lok sumars. Hann hefur sjálfur sagt sig úr flokknum vegna málsins.

Jón segir tildrögin vera þau að 13. september hafi konurnar þrjár, Málfríður Þórðardóttir, Tinna Guðmundsdóttir og Hannesína Scheving Virgild Chester, sem allar eru virkar í starfi flokksins á Akureyri og buðu sig fram í sveitarstjórnarkosningunum í ár, lýst því yfir að þær hafi orðið fyrir kynferðislegri áreitni og andlegu ofbeldi af hálfu Jóns.

Jón segir að ólga hafi verið innan meðlima fólksins frá því í byrjun júní fram að 13. september. Konurnar hafi lýst yfir óánægju sinni með Jón og Brynjólf Ingvarsson, oddvita flokksins, en aldrei rætt um kynferðislega áreitni eða gróft einelti.

Jón vill þó meina að eitthvað hafi gerst þann 6. september en þá hringdi Inga Sæland í hann og úthúðaði Brynjólfi. Hún sakaði Brynjólf um að reyna að sundra og grafa undan flokknum.

„Í máli sínu kemur hún að því oftar en einu sinni að stjórn Flokks fólksins muni funda seinna þennan sama dag og þar verði Brynjólfi gerðir tveir kostir, að fara strax í veikindaleyfi annars verði hann rekinn úr flokknum,“ segir Jón.

Jón bendir á að ekki einu sinni í þessu samtali hafi Inga talað um einelti eða kynferðislega áreitni.

Sama dag og símtalið á sér stað boða konurnar þrjár til fundar fyrir norðan. Brynjólfur gat ekki mætt og þóttist Jón vita hvert erindi fundarins væri. Hann fór því fram á frestun með því að senda: „Gagnrýnum hann [Brynjólf] augliti til auglitis en ekki að honum fjarstöddum, að því er lítill manndómsbragur,“ í skilaboðum. Konurnar féllust ekki á þessa frestun. Jón segir að á þessum fundi hafi ekki verið rætt um neina kynferðislega áreitni eða ofbeldisfulla hegðun.

„Seinna í vikunni er fundað. Málfríður heldur tölu um hvað henni þyki vænt um Brynjólf og hafi miklar áhyggjur af heilsufari hans. Þegar Málfríður víkur sér ítrekað undan að svara spurningu sem snýr að heiðarleika í samskiptum ber undirritaður í borð,“ segir Jón.

Jón segir að það hafi ekki verið fyrr en þrem dögum síðar, þann 13. september sem þeir Brynjólfur eru sakaðir um einelti og kynferðislega áreitni. Hann segist algjörlega koma af fjöllum hvað það varðar. Hann skilji ekki að Guðmundur Ingi, varaformaður flokksins, hafi sagst ítrekað hafa borist fregnir af meintri áreitni og einelti.

„Inga Sæland aldrei reynt sættir eins og hún vill þó vera láta, hvað þá að varaformaðurinn hafi borið þessar ávirðingar undir okkur áður en hann hleypti þeim í loftið fyrir alþjóð að sjá,“ segir Jón.

Þrátt fyrir að Jón, sem og Brynjólfur, hefur sagt sig úr flokknum situr hann enn í skipulagsráði Akureyrarbæjar. Hann er ekki tilbúinn að víkja þaðan nema ef stjórn flokksins hrindir í framkvæmd eigin samþykkt um að skipa hlutlausa rannsóknarnefnd sem skoðar málið.

„Síðan verði haldinn blaðamannafundur í húsakynnum Flokks fólksins þar sem konurnar þrjár, formaður og varaformaður játi mistök, biðjist afsökunar og dragi allan ósómann til baka – því ég er ekki í nokkrum vafa um niðurstöðu slíkrar rannsóknar,“ segir Jón.


Tengdar fréttir

Sitja sem fastast og mynda eigin hreyfingu í bæjarstjórn

Brynjólfur Ingvarsson bæjarfulltrúi á Akureyri mun sitja áfram þrátt fyrir að vera genginn úr Flokki fólksins. Það mun Jón Hjaltason varabæjarfulltrúi líka gera. Þeir hyggjast þétta raðirnar og koma af stað hreyfingu sem berst fyrir kjörum hinna verst settu.

Málið sé yfir­grips­meira en nokkur bjóst við

Inga Sæland, formaður Flokks fólksins, segir stjórn flokksins harmi slegna og sorgmædda vegna frásagna kvenna innan flokksins sem lýst hafa lítilsvirðandi framkomu í sinn garð og í sumum tilfellum kynferðislegri áreitni. Mennirnir sem ásakanirnar beinast að ætla að fara fram á lögreglurannsókn á málinu. Inga fagnar því, og segir málið afar yfirgripsmikið.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.