Neytendur

Vörukarfan lækkar í helmingi verslana

Atli Ísleifsson skrifar
Mest hækkaði vörukarfan í Hagkaup, 4,6 prósent og hækkaði verð í versluninni í öllum vöruflokkum nema einum. Myndin er úr safni.
Mest hækkaði vörukarfan í Hagkaup, 4,6 prósent og hækkaði verð í versluninni í öllum vöruflokkum nema einum. Myndin er úr safni. Vísir/Vilhelm

Vörukarfa ASÍ hækkaði í fjórum af átta matvöruverslunum og lækkaði í fjórum verslunum á fjögurra mánaða tímabili, frá byrjun maí til byrjun september.

Frá þessu segir í tilkynningu frá ASÍ. Þar segir að mest hafi vörukarfan hækkað hjá Hagkaup, 4,6 prósent og næst mest hjá Heimkaup, eða 4,3 prósent. 

„Mest lækkaði vörukarfan í Krambúðinni, 3,9% og um 2,6% hjá Kjörbúðinni. Vörukarfa ASÍ endurspeglar almenn matarinnkaup meðalheimilis. Þess ber að geta að hér eru einungis birtar upplýsingar um verðbreytingar milli verðmælinga. Ekki er því um beinan verðsamanburð að ræða þ.e.a.s. hvar ódýrustu vörukörfuna var að finna.

4,6% hækkun á vörukörfunni í Hagkaup og 4,3% í Heimkaup

Mest hækkaði vörukarfan í Hagkaup, 4,6% og hækkaði verð í versluninni í öllum vöruflokkum nema einum. Mest hækkaði kjötvara og grænmeti í verði hjá Hagkaup en einnig verð á brauð- og kornvöru, mjólkurvörum og hreinlætis- og snyrtivöru. Næst mest hækkaði verð hjá Heimkaup, 4,3% og hækkaði verð í öllum vöruflokkum verslunarinnar nema flokki grænmetis. Í Heimkaup hækkaði verð á ávöxtum og kjötvöru mest. Lítil hækkun var á vörukörfunni í Bónus, 0,9% og Krónunni, 0,4%. Hafa ber í huga að verð í flokki kjötvöru, grænmetis og ávaxta getur sveiflast milli kannanna.

Vörukarfan lækkar í öllum verslunum Samkaupa

Mest lækkaði verð í Krambúðinni, um 3,9%, 2,6% í Kjörbúðinni, 2,2% í Nettó og 1,5% í Iceland. Verslanirnar eru allar hluti af verslanakeðju Samkaupa. Verð á mjólkurvöru, ostum og eggjum lækkaði í öllum fjórum verslununum sem og verð á ávöxtum og grænmeti. Verð á drykkjarvöru í þremur verslunum verslunarkeðjunnar en stóð í stað í Nettó. Verð á hreinlætisvöru lækkaði einnig í öllum þessum verslunum nema Iceland.

Mestar verðhækkanir í flokki brauð- og kornvara, kjötvara og hreinlætis- og snyrtivara

Verð á ávöxtum, og grænmeti lækkaði mest í könnuninni en verð á mjólkurvöru, ostum og eggjum lækkaði einnig nokkuð í sumum verslunum. Verð á kjötvöru hækkaði í helmingi verslana en lækkaði í helmingi verslana. Hafa ber í huga að ávextir, grænmeti og kjötvara eru matvöruflokkar þar sem verð sveiflast mest milli kannana.

Verð á ávöxtum lækkaði í öllum verslunum nema Heimkaup. Mest lækkaði verð á ávöxtum í Krambúðinni, 15,5% á meðan vöruflokkurinn hækkaði um rúm 23% í Iceland. Verð á grænmeti lækkaði í 5 af 8 verslunum, mest í Kjörbúðinni, 16,8%. Verð á kjötvöru lækkaði í 4 verslunum af 8, mest um 8% í Nettó en mest hækkun varð á kjötvöru í Hagkaup, 9,5%. Verð á brauð- og kornvöru hækkaði í meirihluta verslana sem og verð á hreinlætis- og snyrtivöru. Þá hækkaði verð á „ýmissi matvöru“ sem má rekja til töluverðra verðhækkana á fiskmeti en flokkurinn samanstendur af fiski, olíu og feitmeti og loks annarri matvöru, svo sem sósum, kryddi og dósamat,“ segir í tilkynningunni frá ASÍ. 

Verðkannanir ASÍ á vörukörfunni voru gerðar 11. til 18. maí 2022 og 8. til 15. september 2022.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.