Viðskipti erlent

Allt það helsta frá haustkynningu Apple

Samúel Karl Ólason skrifar
Frá kynningu Apple í gær.
Frá kynningu Apple í gær. AP/Jeff Chiu

Forsvarsmenn Apple kynntu í gær nýjar vörur á árlegri kynningu fyrirtækisins. Þar á meðal var kynntur nýr sími, ný snjallúr og ný heyrnartól. Eins og gengur og gerist þá vöktu nýju tækin og tólin  mikla athygli.

Hér að neðan verður stiklað á stóru yfir það helsta sem sýnt var á kynningu Apple í gær.

Nýir símar

Í stuttu máli sagt virðist sem Apple hafi ekki gert miklar breytingar milli iPhone 13 og 14 en myndavélar nýju símanna eru betri. Fyrirtækið kynnti þó iPhone 14 Plus, sem er með stærri skjá og betri rafhlöðuendingu en grunnsíminn.

Hins vegar voru kynntar stærri útgáfur af iPhone 14 sem kallast iPhone 14 Pro og Pro Max. Þeir símar líta öðruvísi út en þeir hefðbundnu og eru með öflugari örgjörva, A16.

Þeir símar eru einnig með bjartari skjá, betri rafhlöðuendingu og betri myndavélar. Þá er Face ID myndavélin komin undir skjáinn og er ákveðið svæði á skjáum símanna sem kallað er „Dynamic Island“ en þar eiga skilaboð og annað að vera sýnileg.

Pro-símarnir verða fáanlegir í fjólubláum lit, gulllit, silfurlit og svörtum lit. Þeir eru hannaðir til að standast meira hnjask en hefðbundnir símar.

Apple kynnti einnig að nýjustu símar fyrirtækisins munu gera eigendum kleift að hringja neyðarsímtöl í gegnum gervihnetti. Það felur í sér að hægt sé að kalla eftir aðstoð, jafnvel þó viðkomandi sé ekki innan hefðbundins þjónustusvæðis.

Það mun þó eingöngu eiga við notendur í Bandaríkjunum og Kanada, samkvæmt The Verge, og verður ókeypis í nýjum símum í tvö ár.

Fyrirtækið opinberaði einnig að nýjustu símarnir í Bandaríkjunum verða ekki með rauf fyrir SIM-kort. Þess í stað verði notast við stafræn kort sem Apple segir að séu öruggari og geta gert notendum kleift að vera með tvö eða fleiri númer í sama símanum, án þess að þurfa að skipta um SIM-kort.

Hér má sjá ítarlega kynningu á nýjustu símum Apple.

Ný snjallúr

Á kynningunni var ný kynslóð snjallúra Apple opinberuð í gær. Auk Apple Watch Series 8 kynnti fyrirtækið Apple Watch Ultra og Apple Watch SE, sem eru dýrari og ódýrari útgáfur af úrunum.

WS8 úrið býr nú yfir hitaskynjara sem Apple segir að geti greint 0,1 gráðu hitabreytingu í notendum. Þá er úrið einnig búið skynjurum sem eiga að greina þegar notendur lenda í árekstri og hjálpa þeim við að hringja eftir aðstoð.

Ultra úrið er ætlað íþróttamönnum og er sérstaklega styrkt gegn skemmdum og sliti. Þá á það einnig að vera með betri rafhlöðuendingu en önnur úr Apple.

Ný heyrnartól

Apple opinberaði einnig ný heyrnartól sem eiga að vera mun betri en síðasta kynslóð heyrnartóla Apple, AirPods Pro 2 eiga að hljóma betur, útiloka utanaðkomandi hljóð betur og endast betur en síðustu AirPods Pro.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.