Tapparnir fastir við gos­flöskurnar

Breytinguna má rekja til Evrópureglugerðar sem snýr að einnota plasti sem sé ætlað að skila sér í að tapparnir skili sér einnig örugglega í endurvinnslu.

Stefán Magnússon, markaðsstjóri hjá Coca Cola á Íslandi, segir að undirbúningur standi nú yfir og að vel sé fylgst með þeim mörkuðum þar sem breytingin hafi nú þegar komið til framkvæmda. „Coca Cola er að byrja með þetta í Noregi og þetta er þegar komið í Þýskalandi. Við lærum af reynslunni þar. Við höfum komist að því að þar hefði þurft af fræða neytendur betur um breytinguna.“

Stefán segist viss um að það muni taka neytendur stuttan tíma að venjast breytingunni. „Það þarf bara að snúa tappanum á ákveðinn hátt þannig að hann sé ekki fyrir þegar drukkið er úr flöskunni. Það venst. En það mikilvægasta er að þetta er breyting sem verður umhverfinu til góðs.“

Tapparnir skila sér flestir

Stefán segir að Coca Cola hafi upphaflega miðað við að ráðast í breytinguna hér á landi um mánaðarmótin september, október. „Við urðum þó að fresta því og miðum nú við febrúar, mars á næsta ári.“

Hann segir að Íslendingar séu almennt frekar duglegir að koma töppunum sem fylgja plastflöskum í endurvinnslu. Þannig skili tappinn sér í endurvinnslu í um 90 prósent tilvika samkvæmt gögnum frá Sorpu,“ segir Stefán. 

Ölgerðin ræðst sömuleiðis í breytingar

Samkvæmt umræddri reglugerð á breytingin á töppunum að vera komin til framkvæmda í síðasta lagi árið 2024.

Guðni Þór Sigurjónsson, forstöðumaður Vöruþróunar og gæðadeildar Ölgerðarinnar, segir að Ölgerðin stefni sömuleiðis á að koma nýjum töppum á markað á nýju ári.