Freyja aflífuð vegna ágangs ferðamanna

Samúel Karl Ólason skrifar 14. ágúst 2022 13:46

Freyja hefur sökkt nokkrum smábátum í höfnum Noregs.

Rostungurinn Freyja var aflífaður í morgun. Sú ákvörðun var tekin að aflífa dýrið eftir að komist var að þeirri niðurstöðu að ágengni almennings og ferðamanna væri of mikil og það skapaði hættuástand. Þrátt fyrir ítrekuð áköll hafi ferðamenn og aðrir áhugasamir ekki haldið nægilegri fjarlægð frá Freyju.

Í tilkynningu frá Fiskistofu Noregs segir að hættuástand hafi myndast nokkrum sinnum vegna ágengni fólks.

Rostungurinn Freyja hefur vakið mikla athygli í Noregi fyrir að leggja sig í höfnum og sökkva jafnvel bátum við að skríða um borð í þá. Hún kom sér fyrir í höfn nærri Osló í sumar og þangað hefur fólk streymt til að bera hana augum.

Þá vöruðu yfirvöld við því að rostungar ættu sér fáa óvini í náttúrunni og hræddust menn ekki. Freyja hikaði ekki við að nálgast menn og gæti verið hættuleg.

Sjá einnig: Vara áhugasama við því að nálgast rostunginn Freyju

Ástandið hefur farið sífellt versnandi og fleiri og fleiri hafa nálgast rostunginn. Fyrr í vikunni tilkynntu yfirvöld í Noregi að mögulega yrði dýrið aflífað vegna þessa og var látið verða af því í morgun.

Til greina kom að reyna að flytja dýrið en það var talið of erfitt og flókin aðgerð.

Í áðurnefndri tilkynningu segir Frank Bakke-Jensen, yfirmaður Fiskistofu Noregs, að hann átti sá því að fólk gæti brugðist reitt við ákvörðuninni. Hann stendur þó við hana og segist viss um að rétt ákvörðun hafi verið tekin. Dýravelferð sé mikilvæg en líf og heilsa fólks verði að vera í forgrunni.

Noregur Dýr

Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.