Innlent

Fáir sigur­vegarar í kjara­samnings­við­ræðum í óða­verð­bólgu

Ólafur Björn Sverrisson skrifar
Halldór Benjamín ásamt fráfarandi forseta ASÍ, Drífu Snædal við undirritun kjarasamninga hjá ríkissáttasemjara. Halldór segir engum til hagsbóta að stjórn ASÍ sé í upplausn en segir lítið svigrúm til launahækkana.
Halldór Benjamín ásamt fráfarandi forseta ASÍ, Drífu Snædal við undirritun kjarasamninga hjá ríkissáttasemjara. Halldór segir engum til hagsbóta að stjórn ASÍ sé í upplausn en segir lítið svigrúm til launahækkana. Vísir/Vilhelm Gunnarsson

Átökin innan verkalýðshreyfingarinnar komu framkvæmdastjóra Samtaka atvinnulífsins ekki á óvart en hann segir það heldur ekki til hagsbóta fyrir samtökin að stjórn Alþýðusambandsins sé í lausu lofti. Ekki virðast samtökin líta svo á að mikið svigrúm sé fyrir launahækkanir í haust.

Síðan lífskjarasamningarnir voru undirritaðir hefur náðst góður árangur, í ljósi erfiðra aðstæðna. Þetta sagði Halldór Benjamín Þorbergsson, formaður Samtaka atvinnulífsins á Sprengisandi í morgun. Hann segir einnig kaupmátt og þrótt atvinnulífsins meiri en spár gerðu ráð fyrir.

Nýjustu vendingar innan verkalýðshreyfingarinnar segir hann ekki hafa komið á óvart, en í kjölfar mikilla átaka sagði Drífa Snædal af sér sem forseti Alþýðusambandsins. Orðræðuna innan verkalýðshreyfingarinnar segir hann ansi hvassa.

Best að hafa sterkan mótaðila

„Við erum einhvern veginn komin inn á efsta stig lýsingarorða og hæsta tón áður en fyrsti fundur um endurnýjun kjarasamninga fer fram. Það finnst mér vera nýnæmi, þetta er að færast fyrr en við höfum séð áður. Ég hefði talið líklegra til að leiða þessa flóknu samninga í jörð að byrja á lágstemmdari nótum en að bæta í þegar vetrinum líður fram.“

Hann bendir á að ASÍ hafi mikilvægu hlutverki að gegna við undirritun kjarasamninga.

„Við þurfum að anda með nefinu og sjá hvernig rykið sest. Sjá hvernig eða hvort þau nái að lægja öldurnar innan Alþýðusambandsins vegna þess að þvert á það sem margir halda þá er það ekki hagur samtaka atvinnulífsins að allt sé í háalofti innan ASÍ. Þvert á móti er það best fyrir okkur að það sé sterkur og trúverðugur mótaðili í Alþýðusambandinu og þess vegna er ég mjög hugsi yfir þessari þróun sem birtist okkur á þessum síðustu dögum,“ segir Halldór.

Hlusta má á viðtalið við hann í heild sinni í spilaranum að neðan.

Ekki feitt tilboð

Kristján Kristjánsson, þáttastjórnandi Sprengisands, bendir á að Samtökin hafi lýst því yfir að besta niðurstaða kjarasamninga, frá sjónarhóli SA, séu hófstilltar launahækkanir þar sem fjögurra prósentu hækkun sé svigrúmið. Launbreytingar á tímabilinu yrðu einkum í formi launaskriðstrygginga um sameinaða launataxta.

„Þetta er nú ekki feitt tilboð í augum þeirra sem fara fyrir róttækari armi?,“ spyr Kristján.

Halldór Benjamín svaraði því til að hann myndi ekki kalla þetta tilboð. Hann segir að þegar horft sé á hagfræðilega hluta kjarasamninga þurfi að vera stærðir sem hægt sé að draga ályktanir af.

„Við höfum áður verið í þessari stöðu. Það að gera kjarasamning í tíu prósenta verðbólgu er afskaplega erfitt, bæði fyrir atvinnurekendur og verkalýðsfélögin. Það eru fáir sigurvegarar í slíku umhverfi.“ sagði Halldór.


Tengdar fréttir

Auglýsingaherferðir og stórar hugmyndir fyrir kjaraviðræður

Bæði atvinnurekendur og leiðtogar stéttarfélaga eru svartsýnir fyrir komandi kjaraviðræður í haust. Á meðan smá stéttarfélög íhuga að ganga ekki sameinuð að samningaborðinu hefur Félag atvinnurekenda stungið upp á því að forstjórar stórfyrirtækja lækki laun sín.

Óttast að of­beldis­menning taki yfir verka­lýðs­hreyfinguna

Stjórn Bárunnar, stéttarfélags, hefur sent frá sér harðorða yfirlýsingu þar sem hún fordæmir allar tegundir ofbeldis og tilburði til eineltis. Báran segir ömurlegt að fylgjast með forystumönnum innan verkalýðshreyfingarinnar fagna afsögn Drífu Snædal.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.