Innlent

Einhver kynferðisbrot tilkynnt eftir helgina en of snemmt að bera saman við fyrri ár

Fanndís Birna Logadóttir skrifar
Eygló Harðardóttir, verkefnastjóri aðgerða gegn ofbeldis hjá ríkislögreglustjóra, segir að fara þurfi betur yfir skráningu mála eftir helgina.
Eygló Harðardóttir, verkefnastjóri aðgerða gegn ofbeldis hjá ríkislögreglustjóra, segir að fara þurfi betur yfir skráningu mála eftir helgina. Vísir/Einar

Ofbeldisbrot um verslunarmannahelgina virðast við fyrstu sýn álíka mörg og fyrir faraldur að sögn verkefnastjóra aðgerða gegn ofbeldi hjá ríkislögreglustjóra. Einhver kynferðisbrot hafi komið á borð lögreglu en hafa þurfi í huga að þau séu yfirleitt tilkynnt seinna. Þá sé sumarið ekki búið og stórir viðburðir fram undan.

Margir voru á ferðinni þessa verslunarmannahelgina eftir erfið sumur síðustu tvö ár. Í Vestmannaeyjum og á Akureyri sögðu lögreglustjórar í hádegisfréttum í gær að helgin hafi verið tiltölulega róleg og jafnvel betri en menn þorðu að vona. 

Eygló Harðardóttir, verkefnastjóri aðgerða gegn ofbeldi hjá ríkislögreglustjóra, segir að heilt á litið hafi það verið staðan víða annars staðar.

„Alla vega miðað við fyrstu upplýsingar, með fyrirvara, að þá er þetta svona á pari miðað við hvernig þetta var fyrir Covid, þá árið 2019, hvað varðar ofbeldisbrotin. En fólk var á fullu að vinna alla helgina og það á eftir að fara betur yfir skráningu mála og síðan taka betur út nákvæmlega hvernig hlutirnir fóru,“ segir Eygló.

Vonandi hægt síðar í mánuðinum að sjá betur hvernig helgin fór

Hún segir einhver kynferðisbrot hafa komið á borð lögreglu eftir helgina, til að mynda greindi lögreglan á Suðurlandi frá einu slíku fyrr í dag. Sögulega séð séu slík brot þó oftast tilkynnt seinna heldur en önnur og því lítið að marka fjöldann að svo stöddu. 

„Þess vegna er mjög mikilvægt að minna á það að það er alltaf hægt að koma, koma á neyðarmóttökuna, fá þar aðstoð, að ganga að sálfræðiþjónustu og réttargæslumanni, og síðan þá líka stuðning til að meta hvort það sé rétt að tilkynna málið til lögreglu eða ekki,“ segir hún.

Ríkislögreglustjóri birtir samantekt með upplýsingum varðandi kynferðisofbeldi ársfjórðungslega og verður það næst gert í ágúst eða september.

„Svo vonumst við til þess að geta raunar skoðað betur tölurnar núna í ágúst, varðandi það hvernig helgin fór. En hins vegar að sama skapi má minna á það að sumarið er ekki búið, framundan eru mjög stórir viðburðir,“ segir Eygló og vísar til Hinsegin daga sem hefjast í dag og síðan Menningarnætur síðar í mánuðinum.

Lögregla muni áfram vinna náið með aðilum skemmtanalífsins til að draga úr ofbeldi og fjölga tilkynningum. Þó mikil uppsöfnuð spenna hafi verið til staðar virðist Covid hafa haft einhver jákvæð áhrif. Fólk fari til að mynda fyrr heim og dreifist betur yfir opnunartímann.

„Ég vona svo sannarlega að það sé raunin og það verði svo áfram, því að þetta er samfélagslegt verkefni og við getum með þessu haft raunveruleg áhrif á það hvort að slæmir hlutir gerast eða ekki,“ segir Eygló.


Tengdar fréttir

Slags­mál og of­drykkja slökkvi­liðinu til ama

Mikill erill var hjá slökkviliðinu á höfuðborgarsvæðinu í nótt, en rekja má hluta álagsins til mikillar ölvunar í miðborginni í gærkvöldi og nótt. Lögreglan hafði þá í nógu að snúast víða um land. 

Djammið enn með Co­vid-ein­kenni

Skemmtanahald um verslunarmannahelgina hefur víða farið vel fram og engar stórar uppákomur komið til kasta lögreglu á helstu útihátíðum. Lögreglan á höfuðborgarsvæðinu segir næturlífið ekki enn hafa tekið á sig sömu mynd og fyrir Covid-faraldurinn.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×